នៅថ្ងៃទី ១១ ខែកញ្ញា ឆ្នាំ ២០២៥ កន្លងទៅនេះ ដំណឹងមរណភាពរបស់តារាសម្ដែងប្រុសចិនដ៏ល្បី លោក Yu Menglong បានធ្វើឱ្យមហាជនអ្នកគាំទ្រលើបណ្ដាញសង្គមទូទាំងប្រទេស បង្ហាញការតក់ស្លុត និង សោកស្ដាយជាខ្លាំង ដោយនៅតែពុំទាន់ទទួលយកបានចំពោះការបាត់បង់សិល្បករដ៏មានសមត្ថភាពរូបនេះ។
បើតាមការបញ្ជាក់ផ្លូវការពីអ្នកនាំពាក្យ studio របស់លោក បានឱ្យដឹងថា តារាប្រុស Yu Menglong បានបាត់បង់ជីវិតនៅថ្ងៃទី ១១ ខែកញ្ញា ឆ្នាំ ២០២៥ ដោយសារការធ្លាក់ពីលើអគារ ហើយក្រោយការស៊ើបអង្កេត ប៉ូលិសមិនរកឃើញថាករណីស្លាប់របស់តារាសម្ដែងប្រុសរូបនេះជាករណីឃាតកម្មនោះឡើយ។ ជាមួយគ្នានោះដែរ ខាងអ្នកកាសែតមកពី YZWB បានចុះទៅកាន់ទីតាំងដែលរាងកាយរបស់ Yu Menglong ត្រូវគេប្រទះឃើញ នាអគារអាផាតមិន Yangguangshangdong នៅសង្កាត់ Chaoyang ក្រុងប៉េកាំង ប្រទេសចិន ដើម្បីទទួលព័ត៌មានបន្ថែមជុំវិញករណីនេះ។
យ៉ាងណាមិញ ចំពោះដំណឹងមរណភាពរបស់តារាសម្ដែងប្រុសល្បីឈ្មោះរូបនេះ ក្រៅពីមហាជនអ្នកគាំទ្រលើបណ្ដាញសង្គមបង្ហាញការតក់ស្លុតសោកស្ដាយ ក្រឡេកមើលអ្នកសិល្បៈរបស់ចិនជាច្រើនរូប ក៏បានបង្ហោះសារចូលរួមរំលែកទុក្ខដ៏ក្រៀមក្រំបន្តបន្ទាប់។
ក្នុងចំណោមសិល្បករជាច្រើននោះ ក៏បានឃើញតារាសម្ដែងស្រីល្បីៗ ២ រូប គឺ Yang Mi និង Dilraba ក៏បានបង្ហោះចូលរួមរំលែកទុក្ខ និង បង្ហាញអារម្មណ៍យ៉ាងរំជួលចិត្តចំពោះការបាត់បង់តារាប្រុស Yu Menglong ផងដែរ។
ចំពោះតារាស្រី Yangmi ក្នុងនាមជាមិត្តរាប់អានស្និទ្ធស្នាល និង ជាដៃគូធ្លាប់សម្ដែងក្នុងរឿង «និស្ស័យស្នេហ៍ទេវតា ៣ ជាតិ» ដែលនាងជាតួអង្គ ប៉ាវ ឈាន ត្រូវជាប្អូនស្រីរបស់តារាសម្ដែងប្រុស Yu Menglong ក្នុងសាច់រឿងនេះ បានបង្ហោះរៀបរាប់យ៉ាងរំជួលចិត្តថា ៖ «បងប្រុសទី ៤ សូមបួងសួងឱ្យបងទៅកាន់ពិភពលោកផ្សេងទៀតឱ្យបានស្ងប់សុខ»។
រីឯតារាសម្ដែងស្រី Dilraba ក៏បានបង្ហោះសារចូលរួមរំលែកទុកក្នុងនាមជាមិត្ត និង ដៃគូសម្ដែងដ៏ស្និទ្ធស្នាលក្នុងរឿង «និស្ស័យស្នេហ៍ទេវតា ៣ ជាតិ» នេះដែរ ដោយនាងជាតួអង្គ ហ្វុង ជីវ ត្រូវជាក្មួយស្រីរបស់តារាប្រុស Yu Menglong បានរៀបរាប់យ៉ាងរំជួលចិត្តថា ៖ «ក្នុងការចងចាំរបស់ខ្ញុំ បងតែងតែជា Bai Zhen ដ៏ទន់ភ្លន់ និង ស្មោះត្រង់។ ក្រោយមក ពេលយើងជួបគ្នាម្ដងទៀតក្នុងកម្មវិធី បងក៏នៅតែជា Yu Menglong ដ៏ទន់ភ្លន់ និង ចិត្តល្អដដែល។ សូមបងទៅកាន់សុគតិភព និង នឹករឭកដល់បងជានិច្ច»៕
