បើគិតមកដល់ពេលនេះ រយៈពេលប្រមាណជាជាង ២ ឆ្នាំ មកហើយ ដែលតារាចម្រៀង ពេជ្រ សោភា និង តារាសម្តែង ឆឹម សក្កដា បានដឹកដៃគ្នាភ្ជាប់ពាក្យកាលពីថ្ងៃទី ១១ ខែវិច្ឆិកា ឆ្នាំ ២០២២ កន្លងទៅ។ ក្នុងនោះ ក្រោយពីភ្ជាប់ពាក្យហើយ តារាប្រុសស្រីទាំង ២ រូប នេះ ក៏មិនដែលបង្ហើបពីថ្ងៃចូលរោងការដែរ ដោយម្នាក់ៗសម្រុកបំពេញការងាររៀងៗខ្លួន។
យ៉ាងណាមិញ ថ្មីៗនេះ អ្នកលេងបណ្តាញសង្គមហ្វេសប៊ុក បាន និង កំពុងចាប់អារម្មណ៍នូវការឆ្លើយឆ្លងរវាង អ្នកនាង ពេជ្រ សោភា និង អ្នកគាំទ្រនៅលើរូបថតមួយ ដែលតារាចម្រៀងស្រីខាងលើបានបង្ហោះឡើងលើផេកហ្វេសប៊ុកផ្លូវការ។
ក្នុងនោះដែរ អ្នកគាំទ្រម្នាក់ បានចូលទៅខមមិនថា៖ «ខ្ញុំពិតជាចង់ឃើញបងភាមានប្ដីហើយរៀបការខ្លាំងណាស់អាយុក៏ច្រើនហើយបងអើយ»។ ភ្លាមៗ អ្នកនាង ពេជ្រ សោភា ក៏បានយកគណនីហ្វេសប៊ុកផ្ទាល់មកឆ្លើយតបក្នុងខមមិនរបស់អ្នកគាំទ្រក្នុងផេករបស់ខ្លួនថា៖ «ខ្ញុំមិនបានគិតរឿងប្តីអីទេបង អាយុច្រើនកាន់តែចង់នៅម្នាក់ឯង»។
ការឆ្លងឆ្លើយរបស់ អ្នកនាង ពេជ្រ សោភា និង អ្នកគាំទ្រនោះដែរ ក៏ធ្វើឱ្យមានការចង់ដឹងពីទំនាក់ទំនងរបស់អ្នកនាង និង គូដណ្តឹង គឺលោក ឆឹម សក្កដា កាន់តែខ្លាំង ថាពេលណាអ្នកទាំង ២ ដឹងដៃគ្នាចូលរោងការ ព្រោះអ្នកគាំទ្រចង់ឃើញតារាប្រុសស្រីទាំង ២ នេះ គ្រងឈុតកូនកំលោះក្រមុំណាស់៕
