តាមការចុះផ្សាយក្នុងស្រុកកន្លងមក អ្នកឧកញ៉ា ជា ទ្រី គឺជាពាណិជ្ជករចាស់វស្សាមួយរូប ដែលបានវិនិយោគ ក្រុមហ៊ុន ហុង ឡេងហ៊ួរ គ្រុប ជាក្រុមហ៊ុនវិនិយោគលើផែស្ងួត ភស្តុភារកម្ម ដឹកជញ្ជូន និង ការនាំចូលទំនិញចម្រុះគ្រប់ប្រភេទ ពីប្រទេសចិនចូលមកក្នុងប្រទេសកម្ពុជា ដែលកំពុងទទួលបានជោគជ័យយ៉ាងសម្បើមប្រមាណជាង ២០ ឆ្នាំមកនេះ។
អ្នកឧកញ៉ាកើតក្នុងឆ្នាំ ១៩៧៥ នៅខេត្តកំពង់ចាម ហើយលោកបានចូលប្រឡូកក្នុងវិស័យជំនួញអស់រយៈកាលជាច្រើនទសវត្សរ៍មកហើយ។ បច្ចុប្បន្ន អ្នកឧកញ៉ាក៏មានតួនាទីជាសមាជិកក្រុមប្រឹក្សាភិបាល នៃសមាគមឧកញ៉ាកម្ពុជា។
ក្រៅពីជាអគ្គនាយកនៃក្រុមហ៊ុន ហុង ឡេងហ៊ួរ គ្រុប ដែលមានប្រតិបត្តិការអាជីវកម្មក្នុងប្រទេសកម្ពុជាជាង ២០ ឆ្នាំ ក្នុងវិស័យភស្តុភារ និង ដឹកជញ្ជូន អ្នកឧកញ៉ា ក៏បានចូលរួមយ៉ាងសកម្មនៅក្នុងសកម្មភាពសង្គម និង សកម្មភាពមនុស្សធម៌ផងដែរ។
ជាក់ស្តែង អ្នកឧកញ៉ាបានបរិច្ចាគទ្រព្យធនជាច្រើន ព្រមទាំងកម្លាំងកាយ ចិត្ត ប្រាជ្ញាស្មារតី និង ពេលវេលា រហូតត្រូវបានទទួលស្គាល់ និង ផ្តល់តម្លៃតាមរយៈការទទួលបាននូវគ្រឿងឥស្សរិយយសជាច្រើនពីសំណាក់រាជរដ្ឋាភិបាលកម្ពុជា ជាពិសេសគ្រឿងឥស្សរិយយសថ្នាក់កំពូល ថ្នាក់ «ជាតូបការ» ដែលប្រោសព្រះរាជទានដោយព្រះមហាក្សត្រ នៃព្រះរាជាណាចក្រកម្ពុជា៕
