បន្ទាប់ពីតែងតាំងជា Miss World Cambodia 2026 កញ្ញា ខន សូរិយា ដែលជាតារាសម្តែង និង ថតស្ពតពាណិជ្ជកម្ម បានកំពុងសកម្មនឹងការពង្រឹងខ្លួន ដើម្បីត្រៀមខ្លួនប្រកួតនៅលើឆាកអន្តរជាតិ។ ទន្ទឹមនឹងទទួលបានការគាំទ្រ នាងក៏ទទួលបានការរិះគន់ផងដែរ ជាពិសេស ទៅលើការដើរបង្ហាញម៉ូដ និង ការឆ្លើយសំណួរ។
ជាក់ស្តែង ដូចថ្មីថ្មោងនេះ នៅក្នុងការ Live មួយអំពីកិច្ចសំណេះសំណាលបេក្ខភាពតំណាងកម្ពុជាត្រៀមខ្លួនទៅប្រកួតឆាកអន្តរជាតិ កញ្ញា ខន សូរិយា Miss World Cambodia 2026 នាងឆ្លើយសំណួរហាក់មិនសូវរលូន ដែលធ្វើឱ្យមហាជនលើបណ្តាញសង្គមមានការរិះគន់ជាខ្លាំង អ្នកខ្លះថានាងឆ្លើយរអាក់រអួលដូចអួលបាយ និង ខ្លះទៀតថាដូចស្លាក់ឆ្អឹងត្រីជាដើម។
ឆ្លើយតបនឹងការរិះគន់នេះ ខន សូរិយា មិនបានតបតប្រឆាំងអ្វីឡើយ ដោយព្រមទទួលស្គាល់ការរិះគន់ និង យកការរិះគន់មកហ្វឹកហាត់ខ្លួនឯងវិញ។ នាងបានបង្ហោះវីដេអូផ្តាំផ្ញើទៅកាន់អ្នកគាំទ្រ ដោយនិយាយថា នាងមិនអីទេ រឿងនេះវាមិនប៉ះពាល់ដល់ផ្លូវចិត្តនាងនោះទេ នាងទទួលស្គាល់ការរិះគន់ និង យកការរិះគន់ទៅហ្វឹកហាត់ខ្លួនឯងវិញ។
ជាងនេះទៅទៀត នាងថែមទាំងទទួលស្គាល់ខ្លួនឯងខ្វះខាតខ្លាំងទៅលើពីរចំណុចគឺ Catwalk ឬ ការដើរបង្ហាញម៉ូដ និង ការឆ្លើយសំណួរ។ ក្រៅពីនេះនាងមានគ្រប់យ៉ាង។ នាងថា នាងជាមនុស្សរៀនចាប់ចេះលឿន ដូច្នេះពីឥលូវរហូតដល់ ២ ខែទៀត មុនទៅប្រកួត នាងធានាថា នឹងធ្វើឱ្យគ្រប់យ៉ាងល្អឥតខ្ចោះ មិនរអាក់រអួលដូចក្នុងការ Live ឡើយ៕
