ច្រើនឆ្នាំមកនេះ តារាចម្រៀងស្រីរាងតូចច្រឡឹង កញ្ញា ឈិត សុវណ្ណបញ្ញា បានធ្វើឱ្យមហាជនអ្នកគាំទ្រជាច្រើន នាំគ្នាចាប់អារម្មណ៍ខ្លាំងចំពោះសកម្មភាពដើរទៅរកផ្លូវព្រះធម៌ គោរពតាមមាគាព្រះពុទ្ធសាសនា យកព្រះធម៌ជាគ្នា ដើរសន្សំបុណ្យ ធ្វើសមាធិឱ្យចិត្តស្ងប់សុខ ស្លៀកសហូបបួស និង សកម្មភាពផ្សេងៗជាច្រើនទៀតអំពើព្រះធម៌។
ជាការពិត ប្រិយមិត្តដែលធ្លាប់ស្គាល់តារាចម្រៀង ឈិត សុវណ្ណបញ្ញា កន្លងមកប្រាកដជាបានជ្រាបហើយថា កញ្ញាគឺជាតារាចម្រៀងរៀមច្បងមួយរូបដែលមានឈ្មោះល្បីល្បាញគួរសមក្នុងវិស័យសិល្បៈ ហើយក៏មានតារាស្រីដែលមានឥទ្ធិពលមួយរូបដែលកាលពីកញ្ញាជាតារាចម្រៀងរបស់ផលិតកម្មរស្មីហង្សមាស ដ្បិតថាក្រោយមក កញ្ញាបានចាកចេញពីទ្រនំចាស់មួយនេះក្ដី ប៉ុន្ដែ ឈិត សុវណ្ណបញ្ញា នៅតែទទួលបានប្រជាប្រិយភាពពីមហាជនមិនជិនណាយទេ។
តែយ៉ាងណាមិញ ច្រើនឆ្នាំកន្លងមកនេះ មហាជនសង្កេតឃើញ ឈិត សុវណ្ណបញ្ញា កាន់តែឃ្លាតកាយឆ្ងាយពីឆាកចម្រៀងបន្តិចម្ដងៗ ហើយបែរជាឃើញកញ្ញាមានសកម្មភាពមមាញឹកនៅក្នុងផ្លូវព្រះធម៌ទៅវិញ ហើយរស់នៅប្រើប្រាស់ជីវិតយ៉ាងស្ងប់ស្ងាត់ ជាមួយផ្ទះធំទ្រនំខ្ពស់ មានជីវភាពល្អប្រសើរជួបជុំក្រុមគ្រួសារប្រកបដោយក្ដីសុខ។
ដ្បិតថាចម្រៀងក៏លែងចេញ ចំណែកឆាកតន្រ្តីក៏មិនសូវឃើញបង្ហាញវត្តមានដូចមុន ប៉ុន្ដែពេលមានកម្មវិធីជួបជុំអ្នកសិល្បៈម្ដងៗ ឈិត សុវណ្ណបញ្ញា តែងបង្ហាញមុខចូលរួមអបអរដល់មិត្តចាស់ក្នុងរង្វង់សិល្បៈកម្រខានណាស់ ហើយបើតាមដឹង នាងក៏មានម្ចាស់បេះដូងរួចហើយដែរ និង តែងបណ្ដើរគ្នាទៅចូលរួមកម្មវិធីជាមួយគ្នាញឹកញាប់ទៀតផង៕
