មហាជននិយមតាមដានរឿងខ្លី និង រឿងភាគកំប្លែង ច្បាស់ជាបានស្គាល់មកហើយ ឌីជេ កាកា ដែលជាសមាជិកនិយមសម្តែងជាមួយនឹង លោក ងួន សុបិន និង នាយ គ្រឿន ជាដើម។ ជាពិសេសនោះ ឌីជេ កាកា ក៏ធ្លាប់បានចូលរួមសម្តែងខ្សែភាពយន្តល្បីៗជាច្រើនរួមមាន រឿង «ជួបស៊យ» រឿង «ព្រលឹងមនុស្សរស់» រឿង «ប្រវត្តស្នេហ៍នាងនាថ» និង រឿងជាច្រើនទៀត ដោយភាគច្រើនស្ថិតក្នុងផលិតកម្ម LD។
មកទល់ពេលនេះរយៈពេលប្រមាណជាង ១០ ឆ្នាំ មកហើយ ដែលមហាជនបានដឹងថា ឌីជេ កាកា បានចូលប្រឡូកក្នុងវិស័យសិល្បៈផ្នែកកំប្លែង តែការពិតទៅ តារាកំប្លែងមុខស្ងួតរូបនេះ មានអាជីពជាតារាចម្រៀងរ៉េបតាំងពីអំឡុងឆ្នាំ ២០០៦ មកម្ល៉េះ។
យ៉ាងណាមិញ ប៉ុន្មានឆ្នាំចុងក្រោយនេះ ឌីជេ កាកា ត្រូវបានមហាជនគាំទ្រ ពីសមត្ថភាព និង ភាពកំប្លុងកំប្លែងរបស់លោកជាច្រើន តែនិយាយពីរឿងរ៉ាវខ្សែជីវិតពិតរបស់លោកកាលពីក្មេងវិញនោះ ប្រហែលជាមិនទាន់មានអ្នកដឹងនៅឡើយ។
កន្លងមក ឌីជេ កាកា ធ្លាប់ឱ្យដឹងថា លោកជាកូនរស់នៅគ្រួសារក្រខ្សត់ ដោយអត់ពេកលោកធ្លាប់ដើររើសអេតចាយ យកប្រាក់មកចិញ្ចឹមជីវិត។ លើសពីនោះ លោកក៏ធ្លាបជាអ្នករត់ម៉ូតូឌុបទៀតផង។ យ៉ាងណាមិញ ក្រោយពីបានបោះជំហាន តស៊ូភាពលំបាកជាច្រើនឆ្នាំ ជីវភាពរបស់លោកក៏បានប្រសើរឡើងដែរ។
ជាងនេះទៅទៀត អ្វីដែលកាន់តែធ្វើឱ្យមហាជនសរសើរនោះ ថ្មីៗនេះ ឌីជេ កាកា បានបំពេញក្តីស្រមៃរបស់ខ្លួនឯងបន្ថែមទៀត ពីក្មេងអ្នករត់ម៉ូតូឌុបក្លាយទៅជាថៅកែក្លឹបរាត្រីមួយកន្លែងមានឈ្មោះថា «Follow Pub»៕
