ជាការពិតណាស់ អ្នកគាំទ្រតារាចម្រៀង Original Song ចិត្ត កញ្ចនា ច្បាស់ជាបានជ្រាបមកហើយថា រយៈពេលចុងក្រោយនេះ នាងហាក់ទទួលបានការចាប់អារម្មណ៍ខ្លាំងៗឡើងពីសំណាក់មហាជន និង ការងារសិល្បៈទាំងក្នុង និង ក្រៅស្រុក។
ក្នុងនោះ កាលពីអំឡុងខែកក្កដា ឆ្នាំ ២០២៤ កន្លងទៅ ចិត្ត កញ្ចនា បានក្លាយជាសិល្បៈការិនីតំណាងឱ្យកម្ពុជាចូលរួមសម្តែងកម្មវិធីលំដាប់អន្តរជាតិនៅប្រទេសកូរ៉េ គឺកម្មវិធី Round Festival 2024។ កាលនោះ ចិត្ត កញ្ចនា បានធ្វើឱ្យអ្នកគាំទ្ររំភើបចិត្ត និង មោទកភាពយ៉ាងខ្លាំងដូចគ្នាដែរ ដែលនាងបានកាន់ទង់ជាតិកម្ពុជាបង្ហាញលើឆាកអន្តរជាតិ។
ម្យ៉ាងវិញទៀត មិនប៉ុន្មានផង កាលពីដើមខែវិច្ឆិកា ឆ្នាំ ២០២៤ នេះ កញ្ញា ចិត្ត កញ្ចនា មានឱកាសជាថ្មីបានក្លាយជាសិល្បការិនីតំណាងឱ្យកម្ពុជាចូលរួមកម្មវិធី Round Festival 2024 ជាថ្មីម្តងទៀត ប៉ុន្តែមានការរៀបចំនៅឯប្រទេសឡាវវិញម្តង។
ភាពជោគជ័យផ្ទួនៗនេះដែរ មហាជនបានស្ងើចសរសើរដល់កញ្ញា ចិត្ត កញ្ចនា ជាខ្លាំង ដែលមិនត្រឹមតែជាសិល្បការិនីខ្លាំងមានការងារក្នុងស្រុកនោះទេ រីឯក្រៅស្រុកនាងបានបង្ហាញខ្លួនជាបន្តបន្ទាប់នោះ។ មិនត្រឹមតែប៉ុណ្ណោះ ក្រោយពីការសម្តែងនៅប្រទេសកូរ៉េ និង ប្រទេសឡាវ នៅថ្ងៃទី ២៨ វិច្ឆកា ដល់ថ្ងៃទី ០៥ ខែធ្នូ ឆ្នាំ ២០២៤ ចិត្ត កញ្ចនា នឹងធ្វើដំណើរទៅកាន់ប្រទេសឥណ្ឌា ចូលរួមកម្មវិធី Asean India Music Festival បន្តទៀត៕
