បន្ទាប់ពីពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំម្សាញ់ បានបញ្ចប់ទៅជាស្ថាពរ ក្រសួងទេសចរណ៍ បានបើកបង្ហាញតួលេខខេត្តក្រុង ដែលទទួលបានភ្ញៀវទេសចរច្រើនជាងគេទាំង ៥ ក្នុងពិធីបុណ្យចូលឆ្នាំខ្មែរទាំង ៣ ថ្ងៃ រួមមាន ៖
− រាជធានីភ្នំពេញ ២.៨៦៣.៩២២ នាក់
− ខេត្តសៀមរាប ២.៧៥២.៨១៨ នាក់
− ខេត្តកំពង់ចាម ២.៧៤៨.២២៨ នាក់
− ខេត្តព្រៃវែង ២.៣៩៤.៣៤៣ នាក់
− ខេត្តបាត់ដំបង ១.៧៤១.៧៩៥ នាក់
តាមរយៈតួលេខដែលបានបង្ហាញនេះដែរ ក្រសួងទេសចរណ៍ បានបញ្ជាក់ឱ្យបានដឹងថា ការបូកសរុបស្ថិតិភ្ញៀវទេសចរ និង បងប្អូនប្រជាពលរដ្ឋ ដែលបានធ្វើដំណើរកម្សាន្តទូទាំងប្រទេសរយៈពេល ៣ ថ្ងៃនេះ គឺត្រូវបានគណនាដោយរាប់បញ្ចូលចំនួនភ្ញៀវទេសចរដែលធ្វើដំណើរកម្សាន្តនៅតាមរមណីយដ្ឋាន និង គោលដៅទេសចរណ៍នានាទូទាំងប្រទេស និង ចំនួនបងប្អូនប្រជាជនដែលបានចូលរួមលេងកម្សាន្តនៅតាមទីតាំងសំខាន់ៗ ដែលមានការរៀបចំកម្មវិធីសង្រ្កាន្ត និង ព្រឹត្តិការណ៍ទេសចរណ៍កម្សាន្តផ្សេងៗ។
ដោយឡែក បើធៀបទៅឆ្នាំមុន ពោលគឺចូលឆ្នាំខ្មែរ ឆ្នាំ ២០២៤ ឯណោះវិញ ខេត្តកំពង់ចាម ជាប់ចំណាត់ថ្នាក់លេខ ១ ដោយមានចំនួនទេសចរ ៥,៣ លាននាក់, លេខ ២ ខេត្តព្រៃវែង មានទេសចរ ២,២ លាននាក់, លេខ ៣ ខេត្តកំពង់ស្ពឺ មានទេសចរ ២,១ លាននាក់, លេខ ៤ ខេត្តបាត់ដំបង មានទេសចរ ១,៧ លាននាក់, លេខ ៥ ខេត្តកំពត មានទេសចរជាង ១,៤ លាននាក់ ខណៈរាជធានីភ្នំពេញ លេខ ៦ និង សៀមរាប លេខ ៧។
បើនិយាយពីខេត្តកំពង់ស្ពឺ និង ខេត្តកំពត កាលពីឆ្នាំ ២០២៤ គឺទទួលបានចំណាត់ Top ខ្ពស់ ប៉ុន្តែនៅឆ្នាំ ២០២៥ នេះ ខេត្តទាំង ២ បានធ្លាក់ចុះតួលេខ និង មិនបានចូលទៅកាន់ Top កំពូលទាំង ៥ នោះឡើយ ដោយក្នុងពិធីបុណ្យចូលឆ្នាំខ្មែរទាំង ៣ ថ្ងៃនេះ ខេត្តកំពត មានទេសចរ ចំនួន ១ ៣០៦ ៥៥២ នាក់ និង កំពង់ស្ពឺ មានទេសចរ ចំនួន ១ ៦៤២ ៣២៥ នាក់៕
ដ
2024
