ថ្មីៗនេះ មានរឿងរ៉ាវដ៏គួរឱ្យសរសើររបស់ឆ្កែមួយក្បាលនៅប្រទេសចិន ដែលចេះនាំប្រយោជន៍ឱ្យម្ចាស់ ដោយដើរពាំសំបកដបមកទុកលក់ បានប្រាក់រាប់ពាន់ដុល្លារ ទាំងមិនមាននរណាបង្រៀនសោះ។
តាមព័ត៌មានបានឱ្យដឹងថា ឆ្កែមួយក្បាលនេះ ជាឆ្កែសំណព្វរបស់ម្ចាស់ម្នាក់ដែលរស់នៅខេត្តក្វាងចូវ ប្រទេសចិន។ ម្ចាស់បានរៀបរាប់ឱ្យដឹងថា កាលពីច្រើនឆ្នាំមុន ឆ្កែមួយក្បាលនេះវាបានដើរទៅពាំសំបកដបមួយឱ្យទៅអ្នករើសអេតចាយនៅតាមផ្លូវ ហើយគេក៏បានឱ្យរង្វាន់វាជាសាច់មួយដុំ។ ចាប់តាំងពីពេលនោះមក វាហាក់ដូចជាចាំថាការរើសសំបកដប គឺបានសាច់មួយដុំ ទើបវាដើរចេញទៅក្រៅទៅពាំសំបកដបមកទុកជាប្រចាំ ដោយរើសនៅជិតៗផ្ទះ ហើយចាប់តាំងពីវាល្បីមក មនុស្សម្នាក៏នាំយកសំបកដបមកទុកនៅមុខផ្ទះ រង់ចាំវាមកពាំយកទៅទៀតផង។
យ៉ាងណាមិញ ម្ចាស់បានរៀបរាប់ឱ្យដឹងទៀតថា កន្លងទៅ ៥ ឆ្នាំនេះ តាំងពីវាចេះដើរពាំសំបកដបមក វារកប្រាក់បានប្រមាណជា ១១ ៣០០ យ័ន ដែលស្មើប្រហែលជា ១៥០០ ដុល្លារទៅហើយ ហើយម្ចាស់ក៏បានយកប្រាក់ទាំងនោះទៅបរិច្ចាគដើម្បីបង្កើតប្រយោជន៍ផ្សេងៗដល់សង្គមផងដែរ៕
ប្រភព៖ Khaosod
