កាលពីថ្ងៃទី ១៣ ខែសីហា ឆ្នាំ ២០២៥ កន្លងទៅនេះ មានករណីអគ្គិភ័យមួយ បានឆាបឆេះទៅលើវិហារមួយខ្នងនៃវត្តល្បីមួយក្នុងខេត្តឡាំប៉ាង ប្រទេសថៃ ដែលបណ្តាលឱ្យឆេះព្រះពុទ្ធរូប និង វត្ថុបុរាណអស់ជាច្រើន។
វត្តខាងលើនេះមានឈ្មោះថាវត្តបហេវ ស្ថិតនៅក្នុងឃុំបហេវ ស្រុកមឿងឡាំប៉ាង ខេត្តឡាំប៉ាង តាមព័ត៌មានបានឱ្យដឹងថា នៅវេលាថ្ងៃត្រង់ក្នុងថ្ងៃកើតហេតុ អ្នកស្រុកពីរបីនាក់ បាននាំគ្នាមកធ្វើគោមនៅក្បែរវិហារ ស្រាប់តែធុំក្លិនផ្សែង និង ធុំក្លិនឆេះផ្លាស្ទិក ទើបនាំគ្នាដើររកមើល ក៏ឃើញមានភ្លើងផ្សែងចេញពីព្រះវិហារ ហើយក៏ឆោឡោហៅអាជ្ញាធរមកជួយពន្លត់។
យ៉ាងណាមិញ អាជ្ញាធរប្រើឡានទឹកអស់ចំនួន ៣ គ្រឿង ទើបអាចគ្រប់គ្រងស្ថានការណ៍បាន។ ដោយឡែក ព្រះពុទ្ធរូប ក៏ដូចជាវត្ថុបុរាណជាច្រើនដែលបានដាក់តាំងនៅក្នុងវិហារខាងលើនេះ បានឆេះខូចខាតយ៉ាងដំណំ។ ចំណែកមូលហេតុនៃការឆេះវិញ ត្រូវបានអាជ្ញាធរសន្និដ្ឋានថា អាចបណ្តាលមកពីការឆ្លងចរន្តអគ្គិសនី ព្រោះតែក្នុងវិហារមានកង្ហារភ្ជាប់នឹងជញ្ជាំងរហូតដល់ទៅ ១០ គ្រឿងឯណោះ៕
ប្រភព៖ Khaosod
