មហាជនអ្នកស្នេហាវិស័យរបាំបុរាណខ្មែរ ច្បាស់ជាបានជ្រាបមកហើយពី ក្រុមសិល្បៈយុវជនល្ខោនខោល និង របាំបុរាណជំនាន់ថ្មី ដែលមានលោក ហង់ ភូមិរ៉ា ហៅ យាយកន្តែរ៉ែ គឺជាប្រធាន។ ក្នុងនោះ ក្រុមសិល្បៈយុវជនល្ខោនខោល និង របាំបុរាណជំនាន់ថ្មី បានផ្តល់ឱកាសដល់យុវជន យុវតី ចាប់យកជំនាញផ្នែករបាំបុរាណ ដោយឥតគិតថ្លៃការសិក្សាទៀតផង។
យ៉ាងណាមិញ រយៈពេលប៉ុន្មានឆ្នាំមកនេះ ក៏មានយុវជន យុវតីជាច្រើនមកហើយ ដែលបានរៀនសូត្រ ក្រេបយកចំណេះដឹងពី ក្រុមសិល្បៈយុវជនល្ខោនខោល និង របាំបុរាណជំនាន់ថ្មី បង្កើតបានជាជំនាញ ក៏ដូចជាចូលរួមលើកស្ទួយវិស័យវប្បធម៌ របាំបុរាណ របាំប្រពៃណី ល្ខោនខោលជាបន្តបន្ទាប់។
យ៉ាងណាមិញ ថ្មីៗនេះ តាមរយៈផេកហ្វេសប៊ុកផ្លូវការរបស់ លោកគ្រូ ហង់ ភូមិរ៉ា បានឱ្យដឹងដែរថា ពេលនេះ មានសិស្សបានបន្តមកចុះឈ្មោះចូលរៀនច្រើនឡើងៗ និង ប្រឹងប្រែងហ្វឹកហាត់ បើទោះជាមិនបានល្អក្តី ប៉ុន្តែនេះបានសបញ្ជាក់ឱ្យឃើញថា យុវជនខ្មែរជំនាន់ក្រោយបានចូលរួម ដើម្បីវប្បធម៌ជាតិដួងព្រលឹងជាតិយើង៕
