ជាការពិតណាស់ ថ្មីៗនេះ អ្នកនិយមតាមដានពីកម្មវិធីប្រកួតចម្អិនម្ហូបលំដាប់ពិភពលោក MasterChef Cambodia ច្បាស់ជាបានជ្រាបមកហើយ ពីការចែករំលែក បញ្ចេញមតិនានាពីសំណាក់បេក្ខភាពនារដូវកាលទី ៣ ពាក់ព័ន្ធនឹងអំឡុងពេលប្រកួត។
ក្នុងនោះដែរ មានបេក្ខជនខ្លះបានបង្ហាញអារម្មណ៍មិនពេញចិត្ត ដោយរៀបរាប់ពីរឿងអវិជ្ជមាន និង មានបេក្ខជនខ្លះក៏បានលើកពីផលវិជ្ជមានរបស់កម្មវិធី រហូតផ្ទុះការវែកញែកពេញបណ្តាញសង្គមហ្វេសប៊ុក។
ទន្ទឹមគ្នានោះដែរ អ្នកគាំទ្រក៏បានឃើញអ្នកនាង លឹម លីនដា Top 2 MasterChef Cambodia រដូវកាលទី ៣ ក៏បានចេញមកបង្ហាញអារម្មណ៍ពេលប្រកួតនោះដែរ ដោយសំណេររបស់ម៉ាក់ៗប្រចាំផ្ទះបាយ MasterChef Cambodia រដូវកាលទី ៣ នេះ ធ្វើឱ្យមហាជនពេញចិត្តយ៉ាងខ្លាំង ព្រោះតែការរៀបរាប់ពោរពេញដោយក្រមសីលធម៌។
អ្នកនាង លឹម លីនដា រៀបរាប់ថា៖ «និយាយការពិតទៅ ខ្ញុំក៏មិននឹកស្មានថាអាចចូលខ្លួនជាបេក្ខភាពក្នុង កម្មវិធីលំដាប់ពិភពលោក Master chef Cambodia នៅក្នុងរដូវកាលទី ៣ នេះដែរ។ ហេតុផលគឺ៖ ១. ចង់ដឹងសមត្ថភាពផ្ទាល់ខ្លួន ២.ចង់ស្វែងយល់ពីកម្មវិធី ៣.ចង់បានបទពិសោធពីម្ហូបបស្ចឹមប្រទេស។
បន្ទាប់ពីខ្ញុំបានចូលប្រលូកក្នុងរយៈពេលជាង ៣ ខែ កន្លងមក ពិតណាស់ខ្ញុំទទួលបានអត្ថប្រយោជន៍ជាច្រើនពីកម្មវិធី បានទាំងចំណេះដឹងបន្ថែម និង បទពិសោធជាច្រើនពីគណៈកម្មការទាំងបី បទពិសោធពីបេក្ខជនផ្សេងៗ។ អ្វីដែលសំខាន់ ខ្ញុំជាមនុស្ស ដែលអៀនច្រើន ប្រែជាមនុស្សក្លាហានម្នាក់ ហើយធ្វើឱ្យខ្ញុំក្លាយជាមនុស្សរបស់មហាជន ដែលមានហ្វេនជាច្រើនទាំងក្នុង និង ក្រៅប្រទេសបានស្គាល់ និង ស្រលាញ់គាំទ្រពិតជាមិននឹកស្មានដល់។
ពិតជារំភើប ហើយក៏សូមអរគុណដល់កម្មវិធី MasterChef Cambodia និង អរគុណដល់ស្ថានីយទូរទស្សន៍ CTN TV ដែលបង្កើតកម្មវិធីនេះឡើង ដែលធ្វើឱ្យកូនខ្មែរអាចបញ្ចេញសមត្ថភាព! អរគុណក្រុមការងារទាំងអស់ ដែលជាចំណែកមួយធំ ដែលធ្វើឱ្យកម្មវិធីអាចដំណើរយ៉ាងរលូន និង ធ្វើឱ្យមហាជនបានទស្សនាយ៉ាងជក់ចិត្ត។ ចុងក្រោយ អរគុណដល់ហ្វេនៗទាំងក្នុង និង ក្រៅប្រទេសដែលតែងស្រលាញ់ គាំទ្រខ្ញុំរហូតមក ស្រលាញ់ហ្វេនៗទាំងអស់គ្នា»៕
