ច្បាស់លាស់! ការនាំចូលរថយន្តពីសហរដ្ឋអាមេរិកមកកម្ពុជា រថយន្តដែលអាចស្នើសុំអត្រាពន្ធគយ ០% បាន ត្រូវមានលក្ខខណ្ឌ ៣ នេះ

នៅព្រឹកថ្ងៃទី ១២ ខែសីហា ឆ្នាំ ២០២៥ នេះ អគ្គនាយកដ្ឋានគយ និងរដ្ឋាករកម្ពុជា បានចេញសេចក្តីណែនាំថ្មីមួយ ស្តីពីនីតិវិធីនៃការបំពេញបែបបទគយ ចំពោះទំនិញមានដើមកំណើតនៅសហរដ្ឋអាមេរិក និង នាំចូលពីសហរដ្ឋអាមេរិកមកកម្ពុជា។

តាមរយៈការណែនាំ ស្តីពីនីតិវិធីនៃការបំពេញបែបបទគយ អគ្គនាយកដ្ឋានគយ និងរដ្ឋាករកម្ពុជា បានបញ្ជាក់ឱ្យដឹងថា យានយន្តដែលអាចស្នើសុំអត្រាពន្ធគយ ០% គឺរថយន្តត្រូវមានលក្ខខណ្ឌដូចខាងក្រោម ៖

– ផលិតនៅ សហរដ្ឋអាមេរិក

– ជារថយន្តដែលមានឆ្នាំម៉ូដែល ១ ឆ្នាំមុនឆ្នាំបច្ចុប្បន្ន (N-1) ឬក្នុងឆ្នាំបច្ចុប្បន្ន (N) ឬ ១ ឆ្នាំក្រោយឆ្នាំបច្ចុប្បន្ន (N+1) និង មានចម្ងាយប្រើប្រាស់មិនលើសពី ៥ ០០០ គីឡូម៉ែត្រ ក្នុងកញ្ចក់ម៉ែត្ររថយន្ត (Odometer)

– ជារថយន្តដែលមានស្ថានភាពល្អក្នុងទម្រង់ដើម ដែលមិនបុក ប៉ះទង្គិច ខូចខាត រងការលិចទឹក ឬរងគ្រោះថ្នាក់ផ្សេងទៀត។

ដោយឡែក ចំពោះទោចក្រយានយន្ត ត្រីចក្រយានយន្ត និង ATV ត្រូវមានលក្ខខណ្ឌដូចខាងក្រោម៖

– ផលិតនៅសហរដ្ឋអាមេរិក

– ជាយានយន្តដែលមានឆ្នាំម៉ូដែល ១ ឆ្នាំ មុនឆ្នាំបច្ចុប្បន្ន (N-1) ឬក្នុងឆ្នាំបច្ចុប្បន្ន (N) ឬ ១ ឆ្នាំក្រោយឆ្នាំបច្ចុប្បន្ន (N+1) និង មានចម្ងាយប្រើប្រាស់មិនលើសពី ២ ០០០ គីឡូម៉ែត្រ ក្នុងកញ្ចក់ម៉ែត្រយានយន្ត (Odometer)

– ជាយានយន្តដែលមានស្ថានភាពល្អក្នុងទម្រង់ដើម ដែលមិនបុក ប៉ះទង្គិច ខូចខាត រងការលិចទឹក ឬ រងគ្រោះថ្នាក់ផ្សេងទៀត៕