ច្បាស់ការ! នេះជាមូលហេតុ បញ្ជាក់ដោយអ្នកជំនាញ ករណីសត្វស្លាបដែលស្លា/ប់ជាប្រភេទ «ប្រវឹក» និង មិនទាក់ទងនឹងផ្សែងពុលទេ

នៅថ្ងៃទី ២១ ខែសីហា ឆ្នាំ ២០២៥ រដ្ឋបាលស្រុកអន្លង់វែង បានចេញសេចក្ដីប្រកាសព័ត៌មាន បន្ទាប់ពីកាលពីថ្ងៃទី ២០ ខែសីហា ឆ្នាំ ២០២៥ កន្លងទៅ មានគណនីហ្វេសប៊ុកឈ្មោះ ម៉ាក់ អូនយ៉ា បានបង្ហោះវីដេអូផ្សព្វផ្សាយអមដោយខ្លឹមសារ ៖ «បក្សីមានស្លាបហោះផងនៅតែ…. ចុះទម្រាំមនុស្សប៉ះពាល់យ៉ាងណា?…» ដែលក្នុងវីដេអូនេះ ហាក់មាន អត្ថន័យបញ្ជាក់ថា មានករណីសត្វស្លាបបានងាប់ដោយសារផ្សែងពុល។

ភ្លាមៗនោះ រដ្ឋបាលស្រុកអន្លង់វែង បានអញ្ជើញលោកស្រី ឡុង សុផាត ម្ចាស់គណនីហ្វេសប៊ុក ឈ្មោះ ម៉ាក់ អូនយ៉ា មកបញ្ជាក់ឡើងវិញពីករណីខាងលើ ហើយលោកស្រីបានបំភ្លឺថា រូបគាត់ពុំបាន ទៅដល់កន្លែងសត្វស្លាបងាប់ដោយផ្ទាល់នោះទេ គ្រាន់តែបានឃើញការបង្ហោះករណីសត្វស្លាបងាប់ គាត់ក៏បានទាញយកវីដេអូមកបង្ហោះបន្ត ក្នុងគោលបំណងឱ្យប្រជាពលរដ្ឋមានការប្រុងប្រយ័ត្នតែប៉ុណ្ណោះ។ ក្នុងនោះ បើតាមការបញ្ជាក់របស់លោក ហ៊ន់ ផាត អនុភូមិថ្នល់កែង ឃុំអន្លង់វែង ស្រុកអន្លង់វែង ទទួលការងារខុសត្រូវសម្អាតបរិស្ថានបានប្រាប់ថា កាលពីថ្ងៃទី ១៧ ខែសីហា ឆ្នាំ ២០២៥ វេលាម៉ោង ០៨:០០ ព្រឹក ឃើញរថយន្តមួយគ្រឿង ម៉ាក LEXUS LX300 ពណ៌ស ពុំចាំស្លាកលេខ បើកពីត្បូងទៅជើង បានកិនហ្វូងសត្វស្លាបបណ្តើរកូន បណ្តាលឱ្យងាប់ចំនួន ០៧ ក្បាល ហើយរូបលោកបានរើសមកចោលនៅចិញ្ចើមផ្លូវ។

យ៉ាងណាមិញ ទាក់ទិនទៅនឹងករណីសត្វស្លាបងាប់នេះ រដ្ឋបាលស្រុកអន្លង់វែង បានអញ្ជើញក្រុមការងារគ្រូពេទ្យជំនាញ ដែលមានការចូលរួមពីមន្ត្រីជំនាញផលិតកម្ម និង បសុព្យាបាល (ពេទ្យសត្វ) ចុះពិនិត្យកាលពីថ្ងៃទី ២០ ខែសីហា ឆ្នាំ២០២៥ វេលាម៉ោង ១៣:០០ រសៀល ដឹកនាំដោយលោក វេជ្ជបណ្ឌិត ហេង អៀវហុង ឃើញថាមានសត្វស្លាបចំនួន ០៧ ក្បាល បានងាប់ ជាប្រភេទសត្វប្រវឹក មានសភាពសំប៉ែតខ្លួន បែកទ្រូង ស្អុយរលួយ និង បែកក្បាល ដែលអាចបណ្តាលមកពីការប៉ះទង្គិចដោយវត្ថុរឹង ពុំមែនងាប់ដោយសារ ផ្សែងមានសារធាតុពុលនោះឡើយ៕

សូមអានសេចក្ដីលម្អិតនៅខាងក្រោម ៖