ថ្មីៗនេះ នៅឯប្រទេសថៃ មានករណីសត្វតោមួយក្បាលបានរួចពីទ្រុង មកដេញខាំមនុស្សឱ្យរបួសអស់ ២ នាក់ បង្កឱ្យអ្នកស្រុកមានការផ្អើលភ័យខ្លាចយ៉ាងខ្លាំង។
ហេតុការណ៍មួយនេះ បានកើតឡើងកាលពីយប់ថ្ងៃទី ៤ ខែតុលា ឆ្នាំ ២០២៥ កន្លងទៅ នៅឃុំណងគុម ស្រុកប ផ្លយ ខេត្តកាន់ចាណាក់បុរី។ តាមព័ត៌មានបានឱ្យដឹងថា សត្វតោដែលបង្កហេតុជាភេទញី មានអាយុប្រហែល ១ ឆ្នាំ គឺជាសត្វចិញ្ចឹមស្ថិតក្នុងការគ្រប់គ្រងរបស់បុរសជាបុគ្គលល្បីម្នាក់ដែលមានផ្ទះស្ថិតនៅទីតាំងខាងលើ។ នៅថ្ងៃកើតហេតុ សត្វតោបានរួចចេញពីផ្ទះ ហើយក៏បានដេញខាំក្មេងប្រុសអាយុ ១១ ឆ្នាំម្នាក់ ឱ្យរបួសនៅត្រង់ត្រគាក រួចក៏បានក្រញៅបុរសវ័យ ៤៣ ឆ្នាំម្នាក់ទៀតដែលចូលទៅជួយក្មេងនោះឱ្យរបួសដូចគ្នា។
យ៉ាងណាមិញ ក្រោយពីកើតហេតុបុរសជាម្ចាស់បានចេញមកចាប់សត្វតោខាងលើចូលផ្ទះវិញ តែក្រោយមកក៏ត្រូវអាជ្ញាធរបាញ់ថ្នាំសន្លប់រួចបញ្ជូនទៅមជ្ឈមណ្ឌលគ្រប់គ្រងសត្វព្រៃនៅក្នុងតំបន់។ រីឯម្ចាស់ ត្រូវបានអាជ្ញាធរកំពុងរៀបចំដាក់ពិន័យទៅតាមច្បាប់ ដោយក្នុងនោះមានព័ត៌មានបានឱ្យដឹងថា សត្វតោមួយក្បាលនេះធ្លាប់រួចចេញមកក្រៅចំនួន ២ ដងទៅហើយ៕
សូមចុចទីនេះដើម្បីទស្សនាវីដេអូ៖
