រយៈពេល ៣ ទៅ ៤ ថ្ងៃមកហើយ គ្រឿងអលង្ការដែលបាត់ពីសារមន្ទីរ Louvre នៅទីក្រុងប៉ារីស នៅមិនទាន់រកឃើញមុខចោរនៅឡើយ។ អាចថា នេះជាការលួចជាប្រវត្តិសាស្ត្រ ដោយហេតុគ្រឿងអលង្ការ ជាវត្ថុបេតិកភណ្ឌប្រវត្តិសាស្ត្ររបស់បារាំង។
បេសកកម្មរបស់ចោរ ពិតជាលឿនរហ័ស ពួកគេបានធ្វើសកម្មភាពនៅព្រឹកថ្ងៃអាទិត្យ មុនម៉ោងបើកឱ្យចូលទស្សនា។ រយៈពេលមិនដល់ ៨ នាទីផង ពួកគេលួចបានសម្រេច និង ចាកចេញទៅដោយសុវត្ថិភាព។
ក្នុងនោះគ្រឿងអលង្ការ ដែលបាត់មានចំនួន ៨ គ្រឿងដូចជា៖ មកុដ និង កន្លាស់ របស់អធិរាជ Eugénie ព្រះអគ្គមហេសីរបស់ព្រះចៅណាប៉ូឡេអុងទី ៣ (Napoleon III), ខ្សែក និង ក្រវិល ត្បូងមរកត ដែលតាក់តែងព្រះចៅអធិរាជ Marie-Louise, មកុដត្បូងកណ្តៀង ខ្សែក ក្រវិលមួយចំហៀង ដែលជាកម្មសិទ្ធិរបស់ម្ចាស់ក្សត្រិយ៍ Marie-Amélie និង ម្ចាស់ក្សត្រិយ៍ Hortense។ ក្នុងនោះដែរ ចោរក៏លួចមកុដរបស់អធិរាជ Eugénie ប៉ុន្តែត្រូវរកបានឃើញវិញនៅកន្លែងកើតហេតុ ស្ថិតក្នុងសភាពបាក់បែក។
បើតាមរដ្ឋអាជ្ញាសាធារណៈបារាំង គ្រឿងអលង្ការដែលបាត់សរុបជាទឹកប្រាក់ប្រមាណ ៨៨ លានអឺរ៉ូ ឬ ស្មើនឹង ១០២ លានដុល្លារសហរដ្ឋអាមេរិក។ តម្លៃនេះហាក់មិនច្រើនឡើយ បើធៀបជាវត្ថុមានតម្លៃជាប្រវត្តិសាស្ត្រវិញ។
ប៉ុន្មានថ្ងៃនៅតែមិនទាន់រកឃើញដានចោរ អ្នកជំនាញខ្លាចថា គ្រឿងអលង្ការទាំងនេះអាចនឹងគ្មានថ្ងៃត្រលប់។ គេសង្ឃឹមថា ពួកចោរនឹងមិនបំបែកគ្រឿងទាំងនេះដាក់លក់ទៅចុះ៕
ប្រភព៖ BBC
