នៅព្រឹកថ្ងៃទី ២៨ ខែកក្កដា ឆ្នាំ ២០២៥ នេះ អ្នកនាំពាក្យរាជរដ្ឋាភិបាលកម្ពុជា បានបើកសន្និសីទសារព័ត៌មាន ស្ដីពីបច្ចុប្បន្នភាពនៃការឈ្លានពានរបស់កងទ័ពថៃ មកលើទឹកដីកម្ពុជា ដែលមកទល់ថ្ងៃនេះគឺជាថ្ងៃទី ៥ ហើយនៃការឈ្លានពានរបស់ចោរថៃមកលើកម្ពុជា។
នៅក្នុងសន្និសីទសារព័ត៌មាន នៅថ្ងៃទី ២៨ ខែកក្កដា ឆ្នាំ ២០២៥ នេះ លោកជំទាវ ឧត្តមសេនីយ៍ឯក ម៉ាលី សុជាតា អនុរដ្ឋលេខាធិការ និង ជាអ្នកនាំពាក្យក្រសួងការពារជាតិ បានបញ្ជាក់ពីការវិវត្តន៍នៅក្នុងថ្ងៃទី ៥ នៃការឈ្លានពានភាគីថៃមកលើទឹកដីកម្ពុជា ដែលក្នុងនោះឱ្យបានដឹងថា នៅថ្ងៃទី ២៨ ខែកក្កដា ឆ្នាំ ២០២៥ នេះ ខាងទ័ពឈ្លានពានថៃបានបន្តបើកការវាយប្រហារមុនមកលើកម្ពុជា ចាប់ពីម៉ោង ៣ ៖ ១០ នាទី រំលងអធ្រាត្រ នៅចំណុចប្រាសាទតាមាន់ធំ ប្រាសាទតាក្របី ដោយបាញ់ស្រោចរហូតដល់ម៉ោង ៥ ៖ ០៧ នាទីព្រឹក។
ក្នុងនោះ អ្នកនាំពាក្យក៏បានបញ្ជាក់ពីការប្រើប្រាស់ផ្សែងពុល ពីសំណាក់កងទ័ពឈ្លានពានថៃ ក្នុងថ្ងៃទី ២៧ ខែកក្កដា ឆ្នាំ ២០២៥ ចំនួន ២ លើកមកលើកម្ពុជា ដែលកងទ័ពឈ្លានពានថៃ បានប្រើយន្តហោះបាញ់ផ្សែងពុល នៅចំណុចអានសេះ នៅវេលាម៉ោង ១៥ ៖ ១៧ នាទី ថ្ងៃទី ២៧ ខែកក្កដា ឆ្នាំ ២០២៥ និង នៅវេលាម៉ោង ១៧ ៖ ០៦ នាទី ថ្ងៃទី ២៧ ខែកក្កដា ខាងថៃបានប្រើយន្តហោះ ដ្រូនអត្តឃាត គ្រាប់បែកចង្កោម និង ផ្សែងពុល នៅតំបន់ភ្នំខ្មោច៕
