ពិតជាចៃដន់ខ្លាំង ក្រុមហ៊ុន Apple មានបុគ្គលិកម្នាក់ឈ្មោះ Sam Sung ដែលដូចគ្នាទៅនឹងឈ្មោះប្រ៊េនគ្រឿងអេឡិចត្រូនិចដ៏ល្បីមួយ ដែលកំពុងប្រកួតប្រជែងគ្នានៅលើទីផ្សារ។ លោក Sam Sung មានអាយុ ៣៦ ឆ្នាំ បច្ចុប្បន្ន លោកបានប្តូរឈ្មោះទៅជា Sam Struan ដោយហេតុកាលពីជាង ១០ ឆ្នាំមុន លោកត្រូវបានគេយកឈ្មោះទៅលេងសើចនៅលើបណ្តាញសង្គម ខណៈកំពុងធ្វើការនៅហាងលក់ផលិតផលរបស់ក្រុមហ៊ុន Apple។
រំឭកទៅឆ្នាំ ២០១២ ក្នុងវ័យខ្ទង់ ២០ ឆ្នាំ យុវជនឈ្មោះ Sam Sung បានចូលបម្រើការងារនៅហាងលក់ផលិតផល Apple ស្ថិតនៅទីក្រុង Glasgow ប្រទេសស្កុតឡែន។ ដោយឈ្មោះដូចទៅនឹងប្រ៊េនគ្រឿងអេឡិចត្រូនិច Samsung ដែលជាគូប្រកួតប្រជែងគ្នានៅលើទីផ្សារ ជារឿយៗ លោក Sam Sung តែងត្រូវបានក្រុមការងារនិយាយចំអន់សើចជាញឹកញយ ប៉ុន្តែមិនមានជាបញ្ហាអ្វីឡើយ។
មួយរយៈក្រោយមក លោកបានប្តូរទៅរស់នៅប្រទេសកាណាដា និង បានចូលធ្វើការនៅហាងលក់ផលិតផល Apple នៅទីនោះ។ ថ្ងៃមួយទូរស័ព្ទរបស់លោកមានអ្នកខលចូលមិនឈប់ និង មានសារមួយពីបុគ្គលម្នាក់ ដែលគេបាននិយាយថា ឥលូវនេះលោកល្បីខ្លាំងនៅលើបណ្តាញសង្គម Reddit ព្រមទាំងផ្ញើតំណ (link) មួយមកកាន់លោក។
គ្រានោះ លោកមិនស្គាល់អ្វីជា Reddit ឡើយ ដោយគិតថា link អាចជាការបោកប្រាស់ លោកក៏ទុកចោល។ រហូត ៣-៤ ម៉ោងបន្ទាប់ ខាងហាង Apple បានខលទាក់ទងមកលោក ដោយប្រាប់ថា មាននរណាម្នាក់បានយកនាមប័ណ្ណ ឬ business card របស់លោកថតបង្ហោះនៅលើអនឡាញ ហើយវាបានផ្ទុះជាខ្លាំង។
ដំបូងលោកគិតថា ដោយសារតែឈ្មោះរបស់លោកដូចទៅនឹងម៉ាកយីហោក្រុមហ៊ុនប្រកួតប្រជែង ដែលអាចនឹងត្រូវគេបណ្តេញចេញពីការងារ តែយ៉ាងណាមិញ ខាងហាងលក់បានឱ្យលោកនៅស្ងៀមស្ងាត់ ទោះមានគេមករកដល់ហាង ក៏ត្រូវធ្វើជាមិនដឹង មិនស្គាល់។ ជាក់ស្តែង កាលនោះមានមនុស្សជាច្រើនបានមករកលោក សូម្បីខាងសារព័ត៌មាន ក៏បានមកដល់ហាងផងដែរ។
កន្លងទៅពីរបីខែ រឿងរ៉ាវក៏បានស្ងប់ស្ងាត់វិញ តែលោកនៅតែមានអារម្មណ៍ភ័យខ្លាច។ លោកចង់រស់នៅបែបឯកជន និង មានការងារធ្វើប៉ុណ្ណោះ។ ទីបំផុតធ្វើការបានតែមួយឆ្នាំ នៅឆ្នាំ ២០១៣ លោកបានលាឈប់ការងារពីហាង Apple ទៅចាប់ផ្តើមអាជីពថ្មីក្នុងវិស័យជ្រើសរើសបុគ្គលិកវិញ។
នៅក្នុងឆ្នាំ ២០១៤ លោកបានដាក់ដេញថ្លៃនាមប័ណ្ណ និង ឯកសណ្ឋាន ដែលធ្លាប់ជាបុគ្គលិកនៅ Apple ដើម្បីយកលុយទៅធ្វើសប្បុរសធម៌ចំពោះកុមារ។ ការដេញថ្លៃនេះ ទទួលបានតម្លៃ ២៥០០ ដុល្លារ។
ក្រោយមកទៀត ដោយមិនចង់ឱ្យគេយកឈ្មោះទៅលេងសើចបន្តទៀត លោកបានដូរឈ្មោះខាងចុងពី Sam Sung ទៅជា Sam Struan ដោយ Struan ជាឈ្មោះកន្លែងដែលលោកចូលចិត្តបំផុតនៅក្នុងប្រទេសស្កុតឡែន៕
ប្រភព៖ BI
