នៅក្នុងវិស័យជំនួញ គ្រប់គ្នាសុទ្ធតែស្គាល់ច្បាស់នូវ អ្នកឧកញ៉ា លាង ម៉េង ដែលលោកជាថ្នាក់ដឹកនាំកំពូល និង ពោរពេញដោយសមត្ថភាពក្នុងការដឹកនាំរបស់ក្រុមហ៊ុន ជីប ម៉ុង។ ជាក់ស្តែង អ្នកឧកញ៉ាជាសហស្ថាបនិក និង ជាប្រធានក្រុមហ៊ុន ជីប ម៉ុង គ្រុប ដែលជាសម្ព័ន្ធក្រុមហ៊ុនដ៏ធំមួយនៅក្នុងស្រុក ដែលមានបុត្រសម្ព័ន្ធក្នុងពហុវិស័យរួមមាន៖ ក្រុមហ៊ុនលក់សម្ភារ និង ទំនិញ (MFCG), ក្រុមហ៊ុនផលិត ចែកចាយស៊ីម៉ងត៍ និង បេតុងលាយស្រេច, ក្រុមហ៊ុនផលិតភេសជ្ជ ទឹកបរិសុទ្ធ និង ស្រាបៀរ, សណ្ឋាគារ, តំបន់កម្សាន្ត, ទីលានវាយកូនហ្គោល, ធនាគារ, ផ្សារទំនើប, វិស័យលក់រាយ, វិស័យសំណង់ និង អចលនទ្រព្យ រួមទាំង រោងចក្រឧស្សាហកម្មផងដែរ។
ក្នុងនាមជាប្រធានក្រុមហ៊ុន អ្នកឧកញ៉ា លាង ម៉េង បានបំពេញតួនាទីចម្បងក្នុងការដាក់ចេញនូវយុទ្ធសាស្ត្រទាំងរយៈពេលខ្លី មធ្យម និង វែង បន្ទាប់មកសម្របសម្រួលធ្វើផែនការ រៀបចំ ដឹកនាំ គ្រប់គ្រង និងវាយតម្លៃ ធ្វើយ៉ាងណាធានាឱ្យក្រុមហ៊ុនទទួលបាននូវភាពជោគជ័យស្របទៅតាមផែនការ និង ទស្សនវិស័យរបស់ខ្លួន។
ជាការកត់សម្គាល់ ក្រៅពីការផ្តោតទៅលើប្រាក់ចំណេញសម្រាប់ក្រុមហ៊ុន អ្នកឧកញ៉ា ក៏បានយកចិត្តទុកដាក់ខ្ពស់លើការទទួលខុសត្រូវចំពោះសង្គម ដោយបានប្រតិបត្តិការធុរកិច្ចប្រកបដោយអនុលោមភាពខ្ពស់ និង បានចូលរួមយ៉ាងសកម្មក្នុងសកម្មភាពសង្គម និង សកម្មភាពមនុស្សធម៌ជាច្រើនរាប់មិនអស់។ ដូចនេះហើយទើបគេសង្កេតឃើញថា ជីប ម៉ុង គ្រុប តែងតែបានបរិច្ចាគនូវធនធានដ៏ច្រើនជាមួយរាជរដ្ឋាភិបាលលើសកម្មភាពមនុស្សធម៌ សុខាភិបាល អប់រំ កីឡា ការកសាងហេដ្ឋារចនាសម្ព័ន្ធនានា ព្រមទាំងផ្នែកអាណាចក្រផងដែរ។
តាមរយៈសកម្មភាពទាំងនេះ អ្នកឧកញ៉ា ត្រូវបានទទួលស្គាល់ពីរាជរដ្ឋាភិបាលកម្ពុជា តាមរយៈការផ្តល់ជូននូវគ្រឿងឥស្សរិយយសជាច្រើនជាពិសេសគ្រឿងឥស្សរិយយសថ្នាក់កំពូល «ជាតូបការ» ដែលប្រោសព្រះរាជទានដោយព្រះមហាក្សត្រ នៃព្រះរាជាណាចក្រកម្ពុជាថែមទៀតផង។
អ្នកឧកញ៉ា លាង ម៉េង កើតក្នុងឆ្នាំ ១៩៧៥។ អ្នកឧកញ៉ាបានចូលប្រឡូកក្នុងវិស័យជំនួញតាំងពីឆ្នាំ ១៩៩៣ មកក្រោមការដឹកនាំបង្ហាត់បង្ហាញរបស់ម្តាយបង្កើតគឺ លោកជំទាវ អ្នកឧកញ៉ា ភាព ហៀក ដែលជាស្ថាបនិកក្រុមហ៊ុន ជីប ម៉ុង គ្រុប និង បងប្រុសគឺ លោកអ្នកឧកញ៉ា លាង ឃុន។ គួរឱ្យដឹងដែរថា នៅសមាគមឧកញ៉ាកម្ពុជា អ្នកឧកញ៉ាមានតួនាទីជាអនុប្រធានសមាគមផងដែរ៕
