កាលពីថ្ងៃទី ២៥ ខែសីហា ឆ្នាំ ២០២៥ កន្លងទៅនេះ ក្រុមទាហានថៃមួយក្រុម បានព្យាយាមករាយបន្លាលួសជាថ្មីនៅក្នុងភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ដែលធ្វើឱ្យប្រជាជនខ្មែរជាច្រើននាំគ្នាផ្អើលទៅរារាំងតតាំង រហូតក្រុមទាហានថៃដកខ្លួនទៅវិញ។
យ៉ាងណាមិញ ហេតុការណ៍នេះ បានធ្វើឱ្យប្រជាជនថៃមិនពេញចិត្តឡើយ ដោយម្នាក់ៗស្រែកចំទាលថាទឹកដីទីនោះជាទឹកដីរបស់ខ្លួន ហើយទាហានថៃមានសិទ្ធិនឹងព័ទ្ធរបងបន្លាលួសយក ប្រជាជនខ្មែរគ្មានសិទ្ធិមកតវ៉ានោះទេ។ ទាក់ទងនឹងករណីនេះ មាន Influencer ដ៏ល្បីរបស់ថៃម្នាក់ ដែលគេតែងស្គាល់ថាជាមនុស្សចិត្តធម៌ ដើរជួយសង្រ្គោះប្រជាជនក្នុងប្រទេស ឈ្មោះ Gun Jompalang បានបោះសម្តីយ៉ាងគ្មានសីលធម៌ និង ចំណេះដឹង ដោយណែនាំឱ្យថៃ ប្រើវិធីតបតទៅប្រជាជនខ្មែរដែលតវ៉ាជាមួយទាហានថៃ ដោយប្រើឡានបូមលូបាញ់ទឹកលូបង្គន់ ហើយការប្រើវិធីនេះធានាថាមិនមាននរណាហ៊ានមកហែកមាត់ស្រែកដាក់ទាហានថៃទៀតឡើយ។
ដោយឡែក ការប្រើសម្តីបែបនេះ ចាត់ទុកថាជាការមាក់ងាយ និង រើសអើងជាតិសាសន៍ជាខ្លាំង ជាពិសេសគឺសម្តីដែលចេញពីមនុស្សដែលធ្លាប់តែអួតខ្លួនថាជាមនុស្សចិត្តធម៌ដូចជា Gun Jompalang នេះតែម្តង។ ហើយនេះមិនមែនលើកទីមួយនោះទេ ដែល Gun Jompalang បានញុះញង់ឱ្យមានការរើសអើងជាតិសាសន៍ ពោលគឺកន្លងមក តែងតែដើរចាប់បង្រ្កាបជនជាតិខ្មែរដែលនៅក្នុងស្រុកខ្លួនជានិច្ច៕
ប្រភព៖ AMARINTV
