មហាជននិយមតាមដានទស្សនាខ្សែភាពយន្តបែបរន្ធត់ ច្បាស់ជាបានជ្រាបមកហើយនូវរឿង «វិញ្ញាណនិស្សិតពេទ្យ» របស់ Sastra Film ដែលកំពុងចាក់បញ្ចាំងនៅតាមបណ្តារោងភាពយន្តនានា និង កំពុងទទួលបានការចាប់អារម្មណ៍យ៉ាងខ្លាំង។
ក្នុងនោះ តួអង្គសំខាន់ៗ ដែលផ្ទុះការសរសើរ និង គាំទ្រខ្លាំងនោះ គឺតួអង្គ និស្សិតពេទ្រ ដែលសម្តែងដោយស្រីស្អាត ជីហ្ស័ង និង តួអង្គម្តាយ គឺតារាស្រីរៀមច្បង កែវ ស៊ីណាក់ ដោយតួអង្គទាំង ២ ពិតជាសម្តែងបានល្អឥតទាស់។
ជាក់ស្តែង និយាយពីការសម្តែងរបស់តារាស្រីរៀមច្បង កែវ ស៊ីណាក់ ឯណោះវិញ ថ្មីៗនេះ បានធ្វើឱ្យតារាចម្រៀងប្រុស ណុប បាយ៉ារិទ្ធ បង្ហោះសារជាសាធារណៈ ថាលោកធ្វើចិត្តដល់ទៅ ១០ នាទី ទម្រាំវិលត្រឡប់មកសភាពដើមវិញ បន្ទាប់ពីបានទស្សនាឈុតមួយរបស់តារាស្រី កែវ ស៊ីណាក់ សម្តែងជាតួម្តាយ។
តារាចម្រៀង ណុប បាយ៉ារិទ្ធ រៀបរាប់ថា៖ «ខ្ញុំអត់ទ្រាំសរសើរការសម្តែងរបស់គាត់មិនបានទេ! សម្រាប់គាត់ចំពោះខ្ញុំ ខ្ញុំសូមឱ្យគាត់ ១០ លើ ១០ ទាំងអារម្មណ៍ ទឹកមុខ កែវភ្នែក ការប្រើប្រាស់ដង្ហើមក្នុងការសម្តែង ក្នុងការនិយាយ ខ្យស់សម្លេង គឺ perfect តែម្តង។ សូមសរសើរ! ខ្ញុំចាប់អារម្មណ៍ការសម្តែងរបស់គាត់តាំងពីរឿងភាគទូរទស្សន៍ រឿងកុន ពិសេសរឿង «គាស់ផ្នូរអាកុង» និង រឿង «វិញ្ញាណនិស្សិតពេទ្យ» នេះ គាត់សម្តែងបានល្អណាស់ ។ មួយឆាកចុងក្រោយ ឈុតមានគេសម្ភាសន៍គាត់ក្នុងនាមជាម្តាយ ដែលបានបាត់បង់កូនដោយគ្រោះថ្នាក់ចរាចរណ៍ គាត់និយាយឡើងដូចជាម្តាយជនរងគ្រោះពិតៗ ដែលចុងក្រោយមិនអាចទាមទារអ្វីបានមកវិញព្រោះកូនស្លាប់ទៅហើយ ស្តាប់សម្លេង និង អារម្មណ៍ ព្រមទាំងទឹកមុខគាត់អត់មានឃើញថាគាត់សម្តែងសោះ គឺដូចម្ចាស់រឿងដែលកើតឡើងតែម្តង។ វគ្គហ្នឹងក្បែរ ១០ នាទី ទម្រាំខ្ញុំសម្រួលអារម្មណ៍ ក្រោកឈរ ដើរចេញពីកៅអីបាន និង និយាយចេញទៅកាន់អ្នកមកមើលជាមួយ ។ សូមសរសើរអស់ពីបេះដូង បែបនេះទើបហៅថាអ្នកសម្តែង»៕
