ថ្មីៗនេះ មានករណីរបស់បុរសជនជាតិអេស៉្បាញម្នាក់ បានខ្លោចបំពង់អាហារ និង ក្រពះដែលជាអវយវខាងក្នុង ក្រោយពីបានផឹកទឹកសូដាតែមួយក្អឹកសោះ។
ករណីមួយនេះបានកើតឡើងតាំងពីខែមេសា ឆ្នាំ ២០២៥ កន្លងទៅ ដោយបុរសរូបនេះ មានវ័យ ៤២ ឆ្នាំ ជាអ្នកជំនួញមកពីក្រុង Salvaterra de Miño។ នៅថ្ងៃកើតហេតុបុរសនេះបានទៅហាងអាហារមួយកន្លែងជាមួយមិត្តភក្តិ ហើយក៏បានកុម្ម៉ង់ទឹករ៉ែសូដាមួយដបជាមួយទឹកកក និង ក្រូចឆ្មារមួយចំណិត។ លុះផឹកបានតែមួយក្អឹក ស្រាប់តែមានអារម្មណ៍ថាក្តៅក្នុងមាត់យ៉ាងខ្លាំង រួចក៏ស្ទុះទៅស្រវាទឹកក្រូចកូការបស់មិត្ត ហើយរត់ទៅខ្ពុលមាត់ក្នុងបន្ទប់ទឹក។
ទោះបីជាខំខ្ពុលមាត់ និង ផឹកទឹកយ៉ាងណា អាការៈមួយនេះក៏មិនបាត់សោះ ទើបបុរសនេះសម្រេចចិត្តទៅមន្ទីរពេទ្យ ដើម្បីឱ្យគ្រូពេទ្យជួយ។ យ៉ាងណាមិញ បុរសរូបនេះបានឱ្យដឹងថា បំពង់អាហារ និង ក្រពះរបស់ខ្លួនដូចត្រូវគេដុតឡើងខ្មៅ ហើយទទួលទានអាហារ និង ទឹកមិនបានដល់ជិត ១ ខែឯណោះ។ ដោយឡែក មកទល់ពេលនេះ ប៉ូលិសនៅតែរកមិនឃើញមូលហេតុដែលបង្កឱ្យបុរសនេះរងគ្រោះនៅឡើយ មិនប្រាកដថាវាកើតឡើងពីទឹកសូដា ឬយ៉ាងណានោះទេ៕
ប្រភព៖ Khaosod
