ចំពោះស្រីស្អាត Freshie Girl លេខ ១ ជំនាន់ទី ២១ យុវតី គុណ កន្និកា មហាជនបានជ្រាបហើយថា នាងក៏ជាម្ចាស់មកុដនៃកម្មវិធីបវរកញ្ញាយុវតី Miss Teen Icon Cambodia 2024 និង ទើបតែបានបញ្ចប់បេសកកម្មប្រកួតលើឆាកអន្តរជាតិដ៏មានមោទកភាព គឺទទួលបានតំណែងជ័យលាភីលំដាប់រងទី ៣ នៃកម្មវិធី Miss teen icon international 2025។
ក្រៅពីជោគជ័យមួយកម្រិតលើវិស័យបវរកញ្ញា កន្លងមក យុវតី គុណ កន្និកា ក៏ទទួលបានការចាប់អារម្មណ៍ និង សរសើរខ្លាំងលើវិស័យសម្ដែងដែរ ដោយបវរកញ្ញាវ័យក្មេងរូបនេះ កំពុងក្ដោបបានប្រជាប្រិយភាព និង ទីផ្សារខ្លាំងតាមរយៈស្នាដៃសម្ដែងដ៏ប៉ិនប្រសប់ក្នុងភាពយន្តខ្មែរជាច្រើន ទាំងភាពយន្តភាគ និង ភាពយន្តខ្នាតធំ។
លើសពីនេះ អ្វីដែលធ្វើឱ្យមហាជនអ្នកគាំទ្រកាន់តែចាប់អារម្មណ៍ទៀត បើងាកមើលជីវិតឯកជនរបស់យុវតីរូបនេះវិញ ក៏កំពុងចាយជីវិតហាយសូរជោគជ័យទាំងវ័យក្មេងដែរ ខណៈមួយរយៈមុន បានឃើញនាងបង្ហាញការសម្រេចក្ដីស្រមៃថ្មី ចាយលុយទិញរបស់រថយន្តទំនើបចេញពីកម្លាំងញើសឈាមផ្ទាល់ខ្លួនទៀតផង។
ដោយឡែក ថ្មីៗនេះ អ្វីកាន់តែធ្វើឱ្យមហាជនអ្នកគាំទ្រវិស័យបវរកញ្ញាចាប់អារម្មណ៍លើរឿងរ៉ាវឯកជនរបស់បវរកញ្ញាវ័យក្មេងរូបនេះ ទៀត ស្របពេលឈានដល់ថ្ងៃខួបកំណើតចូលវ័យ ២០ ឆ្នាំ ក៏បានឃើញនាងបង្ហោះរូបភាពមួយសន្លឹក បង្ហាញពីបុរសអាថ៌កំបាំងម្នាក់បានទិញផ្កាកុលាបក្រហមអបអរថ្ងៃកំណើតរបស់នាង និង ភ្ជាប់ជាមួយចម្រៀងដ៏ផ្អែមល្ហែមក្នុងន័យជាមនុស្សពិសេស ដែលហាក់បង្ហាញថានាងកំពុងទាក់ទងសាងស្នេហ៍ Private នឹងគ្នាផងដែរ៕
