មហាជន អ្នកគាំទ្រតាមដានសកម្មភាពនានារបស់តារាចម្រៀង Original Song លោក សាយ ដែលជាស្ថាបនិក Run With Sai ច្បាស់ជាបានជ្រាបហើយពីការខិតខំប្រឹងប្រែងរបស់លោក ក្នុងដំណើរនៃការជួយដល់កុមារៗ និង សង្គមក្នុងប្រទេសកម្ពុជាប្រមាណ ៥ ឆ្នាំមកនេះ។
ដោយឡែក ក្នុងព្រឹត្តិការណ៍នៃការរត់របស់លោក សាយ កន្លងមក ពោលគឺកាលពីឆ្នាំ ២០២៤ ក្នុងឱកាស អបអរសាទរ «ទិវាកុមារអន្តរជាតិ» លោក សាយ ក៏ធ្លាប់បានរៀបចំកម្មវិធីមួយ ដើម្បីប្រមូលថវិកាជួយទៅដល់ សាលាទន្សាយ ដែលជាសាលារៀនមួយមើលថែ និង បង្រៀនដល់កុមារអូទីហ្សឹម ស្ថិតក្នុងទីក្រុងភ្នំពេញ ដោយមានឈ្មោះថា «រត់ដោយបេះដូង-RUN BY HEART»។ យ៉ាងណាមិញ នៅក្នុងឆ្នាំ ២០២៥ នេះ ព្រឹត្តិការណ៍ «រត់ដោយបេះដូង-RUN BY HEART» នឹងវិលត្រឡប់មកសារជាថ្មីម្តងទៀត ដែលមានឈ្មោះថា «រត់ដោយបេះដូង លើកទី ២ ឆ្នាំ ២០២៥» ដោយរៀបចំនៅខែឧសភា ឆ្នាំ ២០២៥ ខាងមុខនេះ។
ព្រឹត្តិការណ៍ «រត់ដោយបេះដូង លើកទី២ ឆ្នាំ២០២៥» នេះ គឺរៀបចំឡើងក្នុងគោលបំណងរៃអង្គាសថវិកាសប្បុរសធម៌ សម្រាប់អង្គការសាលារៀនទន្សាយក្នុងបេសកកម្មថែទាំ និង បង្ហាត់បង្រៀន ទៅដល់កុមារអូទីហ្សឹម (Autism) និង លើកកម្ពស់ការថែទាំសុខភាពតាមរយៈការរត់។
ក្នុងនោះ កម្មវិធី រត់ពីចម្ងាយ (Virtual Run) នឹងរៀបចំឡើង ចាប់ពីថ្ងៃទី ១ ខែឧសភា ឆ្នាំ ២០២៥ រហូតដល់ថ្ងៃទី ៣១ ខែឧសភា ឆ្នាំ២០២៥ ដោយមហាជនទូទៅ គ្រប់បណ្តាប្រទេសនានាអាចចុះឈ្មោះរត់បានទៅតាមទីតាំងរបស់ពួកគេ។ រីឯកម្មវិធីពិសេស រត់ដោយបេះដូងជាមួយកុមារអូទីហ្សឹម នឹងរៀបចំឡើងនៅថ្ងៃទី ៣១ ខែឧសភា ឆ្នាំ២០២៥ នៅពហុកីឡដ្ឋានជាតិអូឡាំពិក៕
សូមចុចទីនេះ ដើម្បីទទួលបានព័ត៌មានលម្អិត៖
