ចង់ឱ្យគេសរសើរថាជាបុគ្គលិកល្អ បុគ្គលិកគំរូ និង មើលមកខ្ពង់ខ្ពស់ ពិតណាស់អ្វីៗគ្រប់យ៉ាងគឺត្រូវតែចាប់ផ្តើមពីអ្នក។ ចុះតើគួរចាប់ផ្តើមដោយរបៀបណា? អាកប្បកិរិយា អត្តចរិត សកម្មភាព និង ការនិយាយស្តីទាំងអម្បាលម៉ាននេះហើយ សុទ្ធតែលក្ខណៈសម្បត្តិនៅកន្លែងធ្វើការ ដែលអ្នកគួរតែមាន។
១. ការស្លៀកពាក់
ការចេះរៀបចំខ្លួនរៀបរយ ជាចំណុចចម្បងដែលបង្ហាញពីការគោរព និង ឱ្យតម្លៃក្រុមហ៊ុន។ ជាក់ស្តែង បុគ្គលិកមិនថាតំណែងខ្ពស់ឬទាប ម្នាក់ៗសុទ្ធតែតំណាងជាមុខមាត់ក្រុមហ៊ុន។ ការស្លៀកពាក់ស្អាត និង សមរម្យ ជាពិសេសត្រូវនឹងកាលៈទេសៈ វាមិនត្រឹមតែមើលមកអាជីពប៉ុណ្ណោះទេ តែថែមទាំងជួយឱ្យការណាត់ជួបអតិថិជន អាចចរចាប្រកបដោយប្រសិទ្ធភាពផងដែរ។ លើសពីនេះ ការអនាម័យរាងកាយ ក្លិនខ្លួន ក្លិនមាត់ និង រៀបរយម៉ូដសក់ក៏គប្បីដើរទន្ទឹមគ្នាផងដែរ។
២. អាកប្បកិរិយា
លេងដឹងម៉ោងលេង ធ្វើការដឹងម៉ោងធ្វើការ ពេលខ្លះមិនប្រាកដថាសកម្មភាពដែលអ្នកធ្វើអាចនឹងត្រូវចិត្តមនុស្ស ១០ គ្រប់ទាំង ១០ នាក់នោះទេ។ វិធីល្អបំផុត ត្រូវចេះបត់បែនទៅតាមកាលៈទេសៈ និង ប្រភេទមនុស្ស។
៣. រៀបរយតុធ្វើការផ្ទាល់ខ្លួន
កន្លែងធ្វើការផ្ទាល់ខ្លួនដូចជា តុ កៅអី និង របស់ផ្សេងៗ ប្រៀបបីដូចជាផ្ទះរបស់អ្នកដែរ។ ដូចនេះ គួររៀបចំឱ្យមានរបៀបរៀបរយទាំងតុធ្វើការ និង កន្លែងអង្គុយ ហើយរក្សាអនាម័យជានិច្ច។
៤. ភាពទៀងទាត់
មិនថាការមកដល់កន្លែងធ្វើការ ពេលប្រជុំ ជាពិសេសការណាត់ជួបអតិថិជន ការគោរពពេលវេលាត្រូវបានចាត់ទុកជារឿងសំខាន់បំផុត។ កាលណាអ្នកគោរពពេលវេលាបានល្អ ភាគរយតិចណាស់ដែលអ្នកបរាជ័យ។ ម្យ៉ាងការឱ្យតម្លៃលើភាពទៀងទាត់ ស្មើនឹងអ្នកឱ្យតម្លៃខ្លួនឯងផង និង អ្នកដទៃផង។
៥. ចែកឱ្យដាច់រវាងរឿងផ្ទាល់ខ្លួន និង ម៉ោងធ្វើការ
ការធ្វើការលាយឡំអារម្មណ៍ផ្ទាល់ខ្លួន ជាហេតុនាំឱ្យប៉ះពាល់ដល់ប្រសិទ្ធភាពការងារ។ បើមានរឿងពីផ្ទះគួរទុកមួយឡែក ចាំរហូតដល់ស្អែកឬពេលទំនេរសឹមជួបជុំចែករំលែកគ្នាបន្ធូរអារម្មណ៍។ កាលណាយកអារម្មណ៍មួម៉ៅពីផ្ទះមកកន្លែងធ្វើការ ជួនកាលអាចធ្វើឱ្យខួរក្បាលរាំងស្ទះ គិតអ្វីមិនចេញ កើតស្ត្រេស ឬអាចជះពាក្យសម្តីមិនសមរម្យ ប៉ះពាល់ដល់ទំនាក់ទំនងមិត្តរួមការងារ ឬរហូតគេលែងហ៊ានចូលជិត៕
