ក្រោយពីចូលឆ្នាំថ្មី ឆ្នាំ ២០២៥ មិនបានប៉ុន្មាន អ្នកនិយមតាមដានព័ត៌មានតារាច្បាស់ជាបានឃើញមកហើយ មានសិល្បករ សិល្បការិនីខ្លះ ប្រកាសបើកមុខជំនួយថ្មី និង ខ្លះទៀតទទួលបានការងារបន្ថែម ជាដើម។
ម្យ៉ាងវិញទៀតនោះ គេក៏ឃើញមានសិល្បករ សិល្បការិនី ជាច្រើនបានឃើញមុខសមាជិកថ្មី ពោលគឺជាទាយាទស្នងត្រកូលចូលមកកាន់ក្រុមគ្រួសារថែមទៀតផង ដែលធ្វើឱ្យគ្រួសារកាន់តែមានសុភមង្គល។
ដោយឡែក ក្រឡេកទៅមើល ពិធីការិនី ហ៊ិន ច័ន្ទនិរ័ត្ន និង អតីតពិធីការិនី ជំទាវ លីឈី ឯណោះវិញ ក៏បានប្រកាសទទួលសមាជិកថ្មី ចូលមកកាន់ក្រុមគ្រួសារដូចៗគ្នានៅដើមខែកុម្ភៈ ឆ្នាំ ២០២៥ នេះ។
១. ពិធីការិនី ហ៊ិន ច័ន្ទនិរ័ត្ន
ក្រោយរៀបការជាង ១ ឆ្នាំ ហើយនោះ អ្នកនាង ហ៊ិន ច័ន្ទនិរ័ត្ន បានធ្វើការពញ្ញាក់អារម្មណ៍ស្វាមី និង អ្នកគាំទ្រប្រកាសពីដំណឹងពពោះកូនដំបូង នៃចំណងអាពាហ៍ពិពាហ៍របស់អ្នកនាង។ ក្នុងនោះ អ្នកនាង ហ៊ិន ច័ន្ទនិរ័ត្ន បានបញ្ជាក់ថា អ្នកនាង និង ស្វាមីមានគម្រោងយកបុត្រនៅក្នុងឆ្នាំ ២០២៥ នេះ ហើយពេលនេះក្តីបំណងរបស់អ្នកនាងក៏បានសម្រេច។ ដោយឡែក ភេទកូនក្នុងផ្ទៃនៅមិនទាន់ដឹងនៅឡើយនោះទេ ខណៈស្វាមីពិធីការិនីរូបនេះចង់បានកូនប្រុស។
២. អតីតពិធិការិនី ជំទាវ លីឈី
អតីតពិធីការិនី និង តារាសម្តែងស្រី ជំទាវ លីឈី ក្រោយពីរៀបការសាងគ្រួសារអស់រយៈពេលជាង ៥ ឆ្នាំ នឹងអតីតអ្នកដឹកនាំល្បី ឧកញ៉ា ប៊ុន រតនា ហើយក៏ទទួលបានចំណងដៃកូនប្រុសស្រីចំនួន ២ នាក់ ដោយកូនស្រីច្បងមានអាយុជិត ៥ ឆ្នាំ និង កូនប្រុសទី ២ មានអាយុជិត ៣ ឆ្នាំ។ យ៉ាងណាមិញ នៅដើមខែកុម្ភៈ ឆ្នាំ ២០២៥ នេះ អតីតគូស្វាមីភរិយាអ្នកសិល្បៈល្បីឈ្មោះខាងលើ បានប្រកាសដំណឹងទទួលបានសមាជិកថ្មី ជាទាយាទទី ៣ នៅក្នុងគ្រួសារទៀត៕
