Kingchi ត្រូវបានគេចាត់ទុកជាសិល្បកររៀមច្បងផ្នែកចម្រៀងរ៉េបមួយរូប ដែលពោរពេញដោយបទពិសោធ មានទេពកោសល្យ និង ទទួលបានការគោរពស្រឡាញ់ពីរៀមច្បង ព្រមទាំងសិស្សប្អូនជំនាន់ក្រោយៗជាច្រើន។ តាមរយៈសមត្ថភាពទាំងអស់នេះហើយ ធ្វើឱ្យ Kingchi ទទួលបានតំណែងជាគ្រូបង្វឹកក្នុងកម្មវិធីប្រឡងរ៉េប The Rapper Cambodia និង Rapper Fighter រដូវកាលទី ១។
ងាកមកជីវិតឯកជនវិញ តារារ៉េបពូកែលេងពាក្យជួនរូបនេះ មានជីវិតគ្រួសារពោរពេញដោយសុភមង្គល ដោយលោកបានរៀបការជាមួយភរិយាជានារីពូកែម្នាក់ ព្រមទាំងទទួលបានកូន ២ នាក់ជាចំណងដៃ។ ជារឿយៗ Kingchi និង ភរិយាបណ្ដូលចិត្ត តែងបង្ហាញរូបថតជុំគ្រួសារនៅលើបណ្ដាញសង្គមហ្វេសប៊ុក ស្ដែងពីការមើលថែយ៉ាងយកចិត្តទុកដាក់ចំពោះគ្នា ធ្វើឱ្យទំនាក់ទំនងរវាងប្ដីប្រពន្ធ និង កូនៗមានភាពស្និទ្ធស្នាល។
រំឭកដល់ភរិយាជាទីស្រឡាញ់របស់តារារ៉េប Kingchi កន្លងមក អ្នកនាងតែងលើកសរសើរពីភាពល្អរបស់ស្វាមី ការទទួលខុសត្រូវ និង ការបំពេញតួនាទីជាឪពុក និង ជាប្ដីល្អជានិច្ច ហើយរឿងដែលមហាជនចាប់អារម្មណ៍បំផុតនោះ Kingchi ជាបុរសស្មោះស្នេហ៍ ទៅណាមកណាតែងរំឭកពីឈ្មោះភរិយា ហើយបើតាមការបង្ហើបពីភរិយារបស់លោកបានឱ្យដឹងថា Kingchi រកលុយបានមកប្រគល់ជូនប្រពន្ធឱ្យទុកដាក់ចាត់ចែងអស់ៗទៀតផង៕
