ស្ទើរតែរាល់ឆ្នាំ ឱ្យតែដល់ឱកាសខួបកំណើតម្ដងៗ តារាសម្ដែង ប៊ីរីយ៉ា តែងធ្វើពិធីជប់លៀងជួបជុំមិត្តភក្ដិជិតដិត ឆ្លងថ្ងៃពិសេសជាមួយគ្នា ប៉ុន្ដែទោះបីជា តារាស្រីរូបនេះ បានផ្លុំទៀនខួបកំណើតកើនអាយុមួយលេខទៀតក៏ដោយ តែរូបសម្រស់អ្នកនាងហាក់នៅតែដដែល មិនប្រែប្រួលទៅតាមវ័យទាល់តែសោះ។
ប៊ីរីយ៉ា ត្រូវបានគេចាត់ទុកជាតារាស្រីសាច់ចាំ និង ពូកែថែសម្រស់មួយរូប ព្រោះថាពេលនេះ អ្នកនាងមានអាយុ ៣៧ ឆ្នាំហើយ តែសាច់ឈាមវិញ នៅតែសម៉ដ្ឋរលោងស្អាតខ្ចីដូចបណ្ដូលចេក ចំណែករាងរៅវិញ ក៏តូចស្រឡូនមិនចាញ់កាលពីក្រមុំឡើយ។ លើសពីនេះ នាងក៏ជាអ្នកម្ដាយមួយរូប ដែលមើលថែបានទាំងគ្រួសារ និង មុខរបររកស៊ី ដែលបច្ចុប្បន្នកំពុងទទួលបានការគាំទ្រពីអតិថិជន។
ដ្បិតថាបច្ចុប្បន្ន ប៊ីរីយ៉ា បានដកឃ្លាពីសិល្បៈ ហើយងាកទៅមមាញឹកនឹងការងាររកស៊ី ក៏ដូចជាមើលថែក្រុមគ្រួសារ ប៉ុន្ដែស្រីស្រស់រូបនេះ នៅតែក្ដោបបានការស្រឡាញ់ពេញចិត្តពីទស្សនិកជនអ្នកគាំទ្រមិនជិនណាយដដែល៕
