ច្រើនខែមកហើយដែលពិធីការិនីដ៏ល្បីល្បាញ សុភ័ក្រ កុសុម៉ា លាជីវិតនៅលីវហើយយល់ព្រមចាប់ដៃគូស្នេហ៍គឺលោក ផុនផល្លា បញ្ចប់ឈ្មោះជាសង្សារ ប្រារព្ធពិធីមង្គលការក្រាបផ្ទឹមសែនចងដៃតាមប្រពៃណីខ្មែរ បំពេញមុខមាត់ជូនមេបាទាំងសងខាង នៅក្នុងពិធីរៀបការដ៏អធិកអធមមួយកាលពីថ្ងៃទី ៤ ខែវិច្ឆិកា ឆ្នាំ ២០២៥ ក្រោមវត្តមានចូលរួមពីសិល្បករ សិល្បការិនីល្បីៗក្នុងប្រទេសជាច្រើន។
ក្រោមបញ្ចប់ពិធីមង្គលការដ៏អ៊ឹកធឹករួចរាល់ គូស្វាមីភរិយាមួយគូនេះ បានរួមរស់ជាមួយគ្នាប្រកបដោយសុភមង្គល ចំណែកឯការងារសិល្បៈ និង មុខរបររកស៊ីរបស់ពួកគេទាំងពីរ ក៏កាន់តែមមាញឹកខ្លាំងសឹងតែដកឃ្លាមិនរួច។ ជាពិសេស ពេលអ្នកនាង សុភ័ក្រ កុសុម៉ា ទៅច្រៀងនៅទីណា គឺតែងមានវត្តមានស្វាមីសំណព្វចិត្តតាមទៅមើលថែសឹងមិនឃ្លាតគ្នាមួយជំហានឡើយ។
ដោយហេតុឃើញគូស្នេហ៍ថ្មោងថ្មីមួយគូនេះ ស្រឡាញ់ស្អិតល្មួតនឹងគ្នាដូច្នេះ ជារឿយៗ អ្នកនាង សុភ័ក្រ កុសុម៉ា ក៏តែងទទួលបានសំណួរពេញនិយមមួយពីមនុស្សជុំវិញខ្លួន ពីការយកទាយាទស្នងត្រកូល។ ខណៈទទួលបានសំណួរមួយនេះកាន់តែច្រើនឡើង ពិធីការិនីរូបនេះ ក៏ធ្លាប់បង្ហោះនៅលើគណនីហ្វេសប៊ុកថា ៖ «កាលមិនទាន់ការគេសួរកាលយកប្តី ដល់ការហើយ គេសួរកាលបានយកកូន»។
ទោះជាយ៉ាងណា សុភ័ក្រ កុសុម៉ា មិនបានបង្ហើបថា អ្នកនាង និង ស្វាមីនឹងសម្រេចចិត្តយកកូននៅពេលណានោះទេ ប៉ុន្ដែនៅពេលអ្នកនាងចែករំលែកសារមួយនោះហើយ ក៏មានមហាជនជាច្រើនចូលទៅបញ្ចេញយោបល់ ដោយលើកឡើងថា នេះគឺជាសំណួរក៏ពេញនិយមបំផុតមួយនៅក្នុងជីវិតប្រចាំថ្ងៃ៕
