សារព័ត៌មានប្រទេសចិន បានរាយការណ៍រឿងរ៉ាវដ៏គួរឱ្យហួសចិត្តរបស់បុរសម្នាក់ ដែលដេកដណ្តប់ភួយក្រាស់ៗច្រើនជាន់ពេក គ្រាន់តែងាកខ្លួនបន្តិចក៏ស្រាប់តែធ្លាក់ទៅជាប់ផ្អឹបនៅកន្លៀតគ្រែ ដល់ថ្នាក់គេផ្អើលចូលទៅជួយ។
តាមព័ត៌មានបានឱ្យដឹងថា នៅថ្ងៃកើតហេតុបុរសរូបនេះ បានសំងំដេកពេលថ្ងៃដោយបានដណ្តប់ភួយក្រាស់ចំនួន ៦ ជាន់ពីលើគ្នា។ ក្រោយមកនៅពេលដែលគេងាកខ្លួន ក៏ស្រាប់តែធ្លាក់ចូលទៅក្នុងកន្លៀតគ្រែ ហើយក៏ងើបចេញមិនបាន ដោយសារតែភួយក្រាស់ពេករើខ្លួនមិនរួចសោះ ហើយក៏គ្មាននរណានៅផ្ទះទៀតផង ប៉ុន្តែជាសំណាងល្អ បុរសរូបនេះបានដាក់ទូរស័ព្ទនៅក្រោមគ្រែ ទើបបានខលហៅអ្នកសង្រ្គោះមកជួយ ព្រោះកាន់តែក្តៅ និង ថប់ខ្យល់ពិបាកដកដង្ហើម។
ក្នុងនោះ ខាងអ្នកសង្រ្គោះបានចូលមកជួយបុរសរូបនេះយ៉ាងប្រញាប់ ហើយក៏ជួយបានសម្រេច តែគេក៏មិនភ្លេចហួសចិត្តនឹងករណីរបស់បុរសរូបនេះដែរ ព្រោះប៊ិះតែនឹងស្លាប់ដោយសារតែភួយទៅហើយ៕
ប្រភព៖ Khaosod
