កាលពីថ្ងៃទី ៦ ខែមិថុនា ឆ្នាំ ២០២៥ កន្លងទៅនេះ តាមរយៈផេក ហុងស៊ុយ របស់លោកគ្រូចិនសែ ម៉ុង បានចែករំលែករឿងរ៉ាវរាសីជុំវិញឆ្នាំទាំង ១២ ដែលបានកើតឡើង និង របៀបកែកុនក្នុងខែមិថុនា ដោយតាមក្បួនហុងស៊ុយគិតចាប់ពីថ្ងៃទី ៥ ខែមិថុនា ដល់ថ្ងៃទី ៦ ខែកក្កដា ឆ្នាំ ២០២៥ ដែលក្នុងខែនេះ ឆ្នាំទាំង ១២ នឹងជួបប្រទះរឿងល្អខ្លះ និង មិនល្អខ្លះ។
ខាងក្រោមនេះ ជារឿងរ៉ាវឆ្នាំទាំង ១២ ដែលកើតឡើង ក្នុងខែមិថុនា ឆ្នាំ ២០២៥ ៖
១. ឆ្នាំជូត
អ្នកឆ្នាំជូត អាចមានបញ្ហាកើតចេញពីមាត់ ភាគច្រើននិយាយខុសគឺនាំឱ្យបង់ខាតលុយកាក់តែម្ដង ដូចនេះបើអាចកាត់បន្ថយការនិយាយស្ដីបានខ្លះក៏ល្អម្យ៉ាងដែរ។ ចំពោះផ្លូវចិត្តវិញ គឺមិនសូវល្អប៉ុន្មានទេ អ្នកអាចគិតពីអារម្មណ៍របស់អ្នកដទៃច្រើនជាងអារម្មណ៍របស់ខ្លួនឯង នាំឱ្យអ្នកមានសម្ពាធក្នុងជីវិតតែម្ដង។ បើអ្នកជាបុគ្គលិកធ្វើការឱ្យគេវិញ អាចមានកំហុសកើតចេញពីនិយាយទំនាក់ទំនងគ្នាស្ដាប់មិនយល់ នាំឱ្យមានកំហុសធ្ងន់ធ្ងរតែម្ដង។ បើសុខភាពវិញមានសភាពទន់ខ្សោយបន្តិច ក្នុងខែនេះ គ្រោះថ្នាក់គឺភាគច្រើនកើតក្នុងរូបភាពរអិលទឹក ឬ រលាកទឹកក្ដៅជាដើម។
ដំណោះស្រាយ ៖ សូមហូបទឹកតែឱ្យបានច្រើន ហូបអាហារបួសឱ្យបានច្រើន ហូបបន្លែឱ្យបានច្រើន ឬ ធ្វើបុណ្យចែកអាហារចំនួន ៦ នាក់យ៉ាងតិច។
២. ឆ្នាំឆ្លូវ
ខែមិថុនានេះ គឺមានរាសីធ្លាក់ចុះ មិនសូវល្អប៉ុន្មាននោះទេ រឿងស្នេហាគឺមិនសូវល្អនោះទេ ព្រោះអាចមានការទាស់សម្ដីគ្នាជាមួយរឿង ឬ កំហុសពីអតីតកាល ដូចនេះគួរប្រយ័ត្នការនិយាយគ្នាបន្តិច ពុំដូចនេះទេអាចមានការឈ្លោះគ្នាខ្លាំង ឬបែកគ្នាក៏មានដែរ។ ចំពោះអ្នករកស៊ីវិញ ក្នុងខែនេះអាចប្រឈមជាមួយការខាតបង់ដោយសារនាំចូលទំនិញមានបញ្ហា សម្រាប់អ្នកឆ្នាំឆ្លូវអាយុខ្ទង់ម្ភៃ អាចប្រឈមជាមួយគ្រោះថ្នាក់ដោយសារការរអិលនាំឱ្យប៉ះទង្គិចឆ្អឹង ជាពិសេសត្រង់កជើងតែម្ដង។ បញ្ហាលុយកាក់ គឺអាចមានបញ្ហាបន្តិចបន្តួច សូមប្រុងប្រយ័ត្នឱ្យបានខ្ពស់។
ដំណោះស្រាយ ៖ សូមយកខោអាវ ១ កំប្លេ ធ្វើបុណ្យចែកដល់អ្នកក្រីក្រ យ៉ាងតិចឱ្យបានម្នាក់។
៣. ឆ្នាំខាល
ក្នុងខែនេះ រាសីរបស់អ្នកអាចល្អឡើងវិញបន្តិច ជាពិសេសខែនេះអ្នកអាចជួបជាមួយមនុស្សដែលចូលមកជួយដោះស្រាយបញ្ហារបស់អ្នកបានខ្លះ ខ្លះជួយជាយោបល់ ខ្លះជួយជាកម្លាំងតែម្ដង តែត្រូវប្រយ័ត្នរឿង ១ ផ្សេងទៀត ព្រោះក្រោយការគុណគូររួចឃើញថាក្នុងខែនេះ គឺអាចប្រឈមជាមួយការចាញ់បោកអ្នកដទៃផងដែរ ដូចនេះត្រូវចេះប្រយ័ត្នជាមួយមនុស្សជុំវិញខ្លួនឱ្យបានល្អ។ គ្រោះថ្នាក់ដែលគួរប្រយ័ត្នគឺ ការពុលអាហារ ពុលថ្លើម ចំណុច ២ នេះគឺងាយប្រឈមធ្ងន់ធ្ងរ រីឯអ្នករកស៊ី ផ្នែកអាហារ អាចប្រឈមជាមួយបញ្ហាគុណភាពអាហារ ពុលអ្នកហូបជាដើម ដូចនេះគួរប្រុងប្រយ័ត្នឱ្យបានខ្ពស់។ អ្នកដែលត្រៀមចាប់ផ្ដើមរកស៊ី គឺត្រូវពិចារណាឱ្យបានល្អិតល្អន់បំផុត ទើបអាចគេចពីបញ្ហាខាតបង់បានខ្លះ។
ដំណោះស្រាយ ៖ គួរយកទឹក ១ កែវ ឬ ១ ដប ដាក់នៅទិសខាងជើងក្នុងបន្ទប់គេង ឬបន្ទប់ការិយាល័យធ្វើការរបស់អ្នក គឺអាចប្រែបញ្ហាខាងលើឱ្យល្អឡើងវិញបានច្រើនភាគរយគួរសម។
៤. ឆ្នាំថោះ
រាសីខែនេះ គឺមានការធ្លាក់បន្តិច ដូចនេះអ្នកឆ្នាំថោះ ខែនេះអាចមានរឿងខកចិត្តច្រើនគួរសម គឺស្ទើរគ្រប់រឿងតែម្ដង ដូចនេះត្រូវចេះត្រៀមចិត្តទទួលយកផងណា ដើម្បីកុំឱ្យពិបាកចិត្តខ្លាំងពេក។ អ្នកអាចទទួលបានដំណឹងមិនល្អ ពីសាច់ញាត្តិដែលនៅឆ្ងាយពីអ្នក អ្នកអាចប្រឈមជាមួយបញ្ហាឆាប់ខឹង ឆាប់មួម៉ៅ ជាពិសេសគឺឆាប់ជេរស្ដីមនុស្ស ដែលនាំឱ្យមានជម្លោះពាក្យសំដីជាដើម។ សូមប្រយ័ត្នជាមួយគ្រឿងម៉ូទ័រ ដូចជាម៉ូទ័រកាត់ដែក ឬផ្លែម៉ូទ័រ ព្រោះអ្នកអាចជួបគ្រោះថ្នាក់ដោយសារគ្រឿងម៉ូទ័របែបនេះ។
ដំណោះស្រាយ ៖ ក្នុងខែនេះ អ្នកគួរធ្វើកិច្ចងូតទឹកលើករាសីតាមវិធីនេះ យកផ្កាឈូក (ស ឬ ផ្កាឈូក មិនកំណត់) ចំនួន ៧ ផ្លែ បេះស្រទាប់មួយៗ ដាក់ក្នុងឆុងទឹក + អំបិលគ្រោះ ៣ ស្លាបព្រា លាយចូលគ្នា ងូតទឹកឱ្យអស់ វេលាល្អក្នុងការងូត គឺនៅពេលមុនចូលគេង ងូតម្ដងបានហើយ។
៥. ឆ្នាំរោង
ខែនេះ គឺមានរាសីល្អគួរសម ដូចនេះអ្នកឆ្នាំរោង អាចទទួលបានដំណឹងល្អពីថ្នាក់លើ ដូចជាការផ្ដល់សេចក្ដីទុកចិត្តពីថ្នាក់លើ ផ្ដល់ការងារសំខាន់ដល់អ្នក នេះជាឪកាសល្អរបស់អ្នកហើយ។ សម្រាប់អ្នករកស៊ីវិញ ក្នុងខែនេះការលក់ដូរគឺល្អគួរសម តែគួរប្រយ័ត្នកូនចោរដែលអាចចូលមកបន្លំលួចឥវ៉ាន់តិចតួច បើសិនជាអ្នកកំពុងមានជំងឺវិញ ជាខែដែលអាចទៅព្យាបាលជំងឺបាន គឺអាចទទួលបានលទ្ធផលល្អ។ សម្រាប់អ្នកទើបទិញឡាន ឬម៉ូតូថ្មី គួរជ្រើសរើសថ្ងៃខែល្អ ដើម្បីទិញ ដើម្បីការពារកុំឱ្យមានបញ្ហាគ្រោះថ្នាក់នានា។
ដំណោះស្រាយ ៖ សូមព្យាយាមហូបអាហារក្ដៅៗ ឱ្យបានច្រើនតាមដែលអាចធ្វើទៅបាន គឺល្អបំផុត។
៦. ឆ្នាំម្សាញ់
រាសីក្នុងខែនេះ អាចប្រឈមរឿងឈ្លោះជាមួយអ្នកដទៃច្រើន ដូចនេះគួរប្រយ័ត្នបន្តិច អាចងាយក្នុងកើតជំងឺមានដែលអាការៈក្ដៅខ្លួន ឬវិលមុខ ដូចនេះត្រូវចេះប្រយ័ត្នសុខភាពផងដែរ។ អ្នកដែលធ្វើការងារពេលយប់នៅកន្លែងហាងផឹកស៊ីផ្សេងៗ គឺប្រុងប្រយ័ត្នករណីការបៀតបៀនរាងកាយជាដើម ប្រយ័ត្នទំនាក់ទំនងខ្លួនឯងជាមួយប៉ាម៉ាក់ អាចប្រឈមការឈ្លោះសំដីគ្នាធ្ងន់ធ្ងរ រហូតអាចមិននិយាយរកគ្នាយូរថ្ងៃ ឬ ដល់ខែផងដែរ។
ដំណោះស្រាយ ៖ សូមពិសាទឹកឱ្យបានច្រើន តាមដែរអាចធ្វើទៅបាន ដើម្បីកាត់រឿងទាំងអស់នេះ។
៧. ឆ្នាំមមី
ខែនេះ រាសីមិនសូវល្អនោះទេ យ៉ាងតិចមានម្នាក់ក្នុងចំណោមមនុស្ស ១០ នាក់ អាចមានគ្រោះថ្នាក់តាមដងផ្លូវ ដូចនេះអ្នកឆ្នាំមមី គួរប្រយ័ត្ន ឬកុំធ្វើដំណើរចន្លោះម៉ោង ១១ ថ្ងៃត្រង់ ដល់ម៉ោង ១២៖៥៩ ថ្ងៃត្រង់។ អារម្មណ៍គឺមានការប្រែប្រួលច្រើនគួរសម ម្ដងសប្បាយ ម្ដងកើតទុក្ខ ពិបាកគ្រប់គ្រងបន្តិច សុខភាពអាចប្រឈមបញ្ហាបេះដូង ឬ អ្នកដែលជំងឺបេះដូងស្រាប់អាចប្រឈមដូចគ្នា។ ការរកស៊ីវិញ គឺអាចមានបង់ខាត ប្រាក់ចំណេញខ្លះៗ ដូចជាការប៉ះលុយក្លែងក្លាយជាដើម សូមប្រយ័ត្នមនុស្សក្រោមបង្គាប់ ក្បត់ទំនុកចិត្តរបស់អ្នក។ លោកអ្នកក៏អាចមានករណីពុលអាហាររហូតដល់ស្លាប់ផងដែរ អ្នកដែលមានបញ្ហាស្បែក គឺអាចរើឡើង ឬធ្វើទុក្ខច្រើន ក្នុងខែនេះ។
ដំណោះស្រាយ ៖ សូមយកអំបិល ៣ ស្លាបព្រាកាហ្វេ ច្រកដល់កូនថង់តូចមួយ រួចដកទៅដាក់ក្រោមគ្រែ ឬក្រោមខ្នើយ រយៈពេល ១ ខែពេញ ចាំយកចេញទៅបោះចោល។
៨. ឆ្នាំមមែ
រាសីអ្នកក្នុងខែនេះគឺអាចនិយាយថា រាសីល្អគួរសម ក្នុងខែនេះអ្នកមានអត្រាជោគជ័យខ្ពស់លើការងារដែលអ្នកបានធ្វើកន្លងមក។ អ្នកដែលនៅលីវ អាចជួបគូរ អ្នកដែលកំពុងប្រឈមជាមួយរឿងក្ដីក្ដាំង គឺអាចទទួលបានដំណឹងត្រឡប់មកវិញ អ្នកដែលរកស៊ីគឺអាចទទួលបានឪកាសរកប្រាក់ចំនេញធំមួយ អ្នកដែលកំពុងត្រៀមប្រលងនៅសាលា ឬប្រលងវិញ្ញាសារផ្សេងៗ គឺអាចទទួលបានលទ្ធផលល្អ ដោយមិនមានបញ្ហាណាមួយនាំឱ្យខាតប្រយោជន៍នោះទេ
ដំណោះស្រាយ ៖ សូមព្យាយាមធ្វើបុណ្យសំពះព្រះ ថ្វាយពន្លឺភ្លើងទៀនដល់ទេវតា ឬ ទីវត្តអារាមឱ្យបានច្រើនកាន់តែល្អ សូមប្រុងប្រយ័ត្នគ្រប់ពេលវេលាទាំងអស់។
៩. ឆ្នាំវក
រាសីខែនេះ រាសីល្អបន្តិច តែមានរឿងមួយដែលត្រូវប្រយ័ត្ន គឺករណីបាត់ទ្រព្យ ឬចោរកម្មជាដើម ដូចនេះអ្នកគួរប្រុងប្រយ័ត្នពេលចេញដំណើរនានា សូមកុំពាក់គ្រឿងមានតម្លៃច្រើនពេកពេលចេញក្រៅ រឿងផ្សេងៗទៀត គឺអ្នកអាចធ្វើបានធម្មតា។
ដំណោះស្រាយ ៖ គួរចូលរួមបច្ច័យកសាងនានា ក្នុងទឹកប្រាក់យ៉ាងតិច ៧ ម៉ឺនរៀល ឡើងទៅ។
១០. ឆ្នាំរកា
រាសីអ្នកឆ្នាំរកា រាសីល្អគួរសម ខែនេះអ្នករស់នៅរាងតឹងសសៃរកបន្តិច រាល់ការងារផ្សេងៗ ដល់តែមានសំដីធំតូចបន្តិច ទើបអាចទទួលបានលទ្ធផល។ ខែនេះហាមមិនឱ្យអ្នកដទៃខ្ចីលុយនោះទេ ព្រោះអាចមានបញ្ហាពិបាកសង ឬ ត្រូវប្រឈមជាមួយជម្លោះនាំឱ្យមានខូចមិត្តភាពទៀតផង។ អ្នករកស៊ីជាមួយគ្រឿងអលង្ការនានា គឺប្រយ័ត្នក្នុងការលក់ដូរបន្តិច ទើបមិនមានបញ្ហាខាតបង់នានា។
ដំណោះស្រាយ ៖ គួរចូលរួមបច្ច័យកសាងនានា ក្នុងទឹកប្រាក់យ៉ាងតិច ៥ ម៉ឺនរៀល ឡើងទៅ។
១១. ឆ្នាំច
រាសីក្នុងខែនេះ គឺមានភាពល្អប្រសើរច្រើន អ្នកអាចមានគំនិត និង អារម្មណ៍ល្អច្រើនគួរសម ក្នុងការបំពេញការងារផ្សេងៗប្រចាំថ្ងៃ។ ក្នុងខែនេះអ្នកគួរផ្ដោតលើគោលដៅរបស់អ្នកឱ្យបានល្អបំផុត នោះលទ្ធផលក៏អាចទទួលបានយ៉ាងពេញចិត្តដូចគ្នា។ សម្រាប់អ្នកដែលកំពុងមានផ្ទៃពោះ ឬ អ្នកដែលមានប្រពន្ធកំពុងមានផ្ទៃពោះ ក្នុងខែនេះគឺអាចទទួលបានលាភសំណាងធំមួយ។ ខែនេះអ្នកប្រយ័ត្នក្នុងការបើកបរ សូមបើកបរដោយស្មារតីប្រុងប្រយ័ត្នជាប្រចាំ ព្រោះអ្នកងាយប្រឈមជាមួយគ្រោះថ្នាក់ជាមួយអ្នកដទៃ។
ដំណោះស្រាយ ៖ សូមព្យាយាមងូតទឹកក្ដៅឧណ្ហៗឱ្យបានច្រើនដង ឬ ជាប់ជាប្រចាំកាន់តែល្អ ព្រោះអាចធ្វើឱ្យរាសីអ្នកកាន់តែខ្លាំង។
១២. ឆ្នាំកុរ
ឆ្នាំកុរ ខែនេះគឺមិនសូវល្អប៉ុន្មានទេ ភាគច្រើនឪកាសល្អៗ គឺមានអ្នកដទៃមកដណ្ដើម ហើយដណ្ដើមបានជោគជ័យទៀតផង ដូចនេះពេលមានឪកាសល្អនានា សូមលាក់ការផងទៅ កុំនិយាយផ្សព្វផ្សាយឱ្យអ្នកដទៃដឹងឭច្រើនពេកអី។ អ្នកឆ្នាំកុរ អាចងាយរងគ្រោះ នាំឱ្យរបួស ពេលធ្វើដំណើរនៅទីងងឹត ជាពិសេសពេលចុះជណ្ដើរដោយមិនបើកភ្លើង ដូចនេះពេលធ្វើដំណើរតាមផ្លូវ ក៏គួរកុំចេញដំណើរពេលយប់ក៏ល្អម្យ៉ាងដែរ។
ដំណោះស្រាយ ៖ សូមព្យាយាមឱ្យលើខ្លួនអ្នកមានពណ៌ធាតុឈើ ឬពណ៌បៃតង បន្តិចបន្តួចលើខ្លួនកាន់តែល្អ អាចកែរាសីឱ្យឡើងបានបន្តិចឡើងវិញផងដែរ៕
