សារព័ត៌មានក្រៅប្រទេស បានរាយការណ៍ពីករណីដ៏គួរឱ្យហួសចិត្តរបស់ស្រ្តីជនជាតិអាមេរិកម្នាក់ ដែលចង់នាំឆ្កែឡើងជិះយន្តហោះ តែមិនមានឯកសារគ្រប់គ្រាន់ លេងដាច់ចិត្តយកគ្នាទៅជ្រមុជទឹកក្នុងបន្ទប់ទឹកព្រលានយន្តហោះរហូតស្លាប់ ហើយឡើងធ្វើដំណើរតែម្នាក់ឯង។
តាមព័ត៌មានបានឱ្យដឹងថា ហេតុការណ៍បានកើតឡើងនៅថ្ងៃទី ១៦ ខែធ្នូ ឆ្នាំ ២០២៤ កន្លងទៅ នៅអាកាសយានដ្ឋានអន្តរជាតិ Orlando ដោយស្រ្តីរូបនេះមានឈ្មោះថា Alison Agatha Lawrence វ័យ ៥៧ ឆ្នាំ។ ក្នុងនោះ នាងមិនអាចនាំយកសត្វឆ្កែដែលខ្លួនចិញ្ចឹមឡើងលើយន្តហោះបាន ព្រោះតែមិនមានឯកសារអនុញ្ញាតគ្រប់គ្រាន់ អ្វីដែលហួសចិត្តនោះ គឺនាងបាននាំសត្វឆ្កែរបស់នាងទៅជ្រមុជទឹកនៅក្នុងបន្ទប់ទឹកស្រីទាល់តែងាប់ រួចក៏ទុកចោល ហើយនាងក៏ឡើងធ្វើដំណើរតែម្នាក់ឯង។
យ៉ាងណាមិញ បុគ្គលិកអាកាសយានដ្ឋានបានប្រទះឃើញសាកសពឆ្កែនោះ ហើយក៏បានរាយការណ៍ទៅប៉ូលិសភ្លាមៗ ដែលនាងក៏ត្រូវបានអាជ្ញាធរចេញដីកាចាប់ខ្លួននៅថ្ងៃទី ១៨ ខែមីនា ឆ្នាំ ២០២៥ កន្លងទៅនេះ ក្នុងករណីចោទប្រកាន់ការធ្វើទារុណកម្មទៅលើសត្វ។ ពេលនេះនាងកំពុងត្រូវបានគេឃុំខ្លួននៅពន្ធនាគារ Lake County និង រង់ចាំការកាត់ក្តីទៅតាមផ្លូវច្បាប់៕
ប្រភព៖ Sanook
