និយាយពី Miss Queen Cambodia 2021 កញ្ញា សៃ ហ្វុន ដ្បិតតែមិនទទួលបានជោគជ័យក្នុងការប្រកួតដណ្ដើមមកុដ Miss Universe Cambodia 2023 បានត្រឹមដំណែងលំដាប់រងទី ១ មែន តែមកដល់ពេលនេះ នៅតែជាបវរកញ្ញាដ៏លេចធ្លា និង ជាគ្រាប់ពេជ្រក្នុងចិត្តអ្នកគាំទ្រវិស័យបវរកញ្ញា ដែលស្រឡាញ់ពេញចិត្តនាងខ្លាំងដដែល។
លើសពីនេះ បវរកញ្ញាភេទទី ៣ សៃ ហ្វុន តែងទទួលបានការជំរុញលើកទឹកចិត្តពីមហាជនអ្នកគាំទ្រវិស័យបវរកញ្ញាខ្លាំងឱ្យនាងវិលត្រឡប់ចូលប្រកួតដណ្ដើមយកមកុដម្ដងទៀតក្នុងកម្មវិធីណាមួយ ដោយសារតែមើលឃើញពីសមត្ថភាព និង ភាពលេចធ្លោរបស់នាង។
ដោយឡែក ថ្មីៗនេះ ស្របពេលកម្មវិធី MUC 2025 បានរកឃើញម្ចាស់មកុដថ្មី ក្នុងនាមជាសិស្សច្បងមួយរូប សៃ ហ្វុន ក៏បានបង្ហោះសារអបអរចំពោះម្ចាស់មកុដថ្មីដោយក្ដីរំភើបជំនួសផងដែរ។
លើសពីនេះ អ្វីដែលធ្វើឱ្យមហាជនអ្នកគាំទ្រវិស័យបវរកញ្ញាចាប់អារម្មណ៍ និង រំភើបចិត្តជាថ្មីចំពោះ សៃហ្វុន ខណៈបានឃើញនាងបង្ហោះរូបភាពប៉ុន្មានសន្លឹកលើឆាក MUC 2025 ដោយភ្ជាប់សារចោទសួរទៅកាន់មហាជនថា នាងគួរវិលត្រឡប់ចូលប្រកួតវិញឬយ៉ាងណា។ ក្នុងនោះដែរ សៃ ហ្វុន ក៏បានបញ្ជាក់ច្បាស់ៗដោយខ្លួនឯងថា នាងនឹងវិលត្រឡប់មកប្រកួតលើវិស័យនេះវិញទៀតផង៕
