តារាចម្រៀង ប៊ុន សក្ដិ ហាក់កាន់តែរសាត់ឃ្លាតឆ្ងាយពីមហាជនអ្នកគាំទ្រទៅហើយ ដោយចាប់តាំងពីឆ្នាំ ២០១៦ គេកម្របានឃើញវត្តមានតារាចម្រៀងរូបនេះលេចមុខក្នុងពិភពសិល្បៈណាស់ រហូតធ្វើឱ្យមហាជនមួយចំនួនលើកឡើងថា ម្ចាស់បទ «ជិះក្របី» រូបនេះអាចឈប់ពីសិល្បៈហើយ ព្រោះមិនសូវឃើញមុខតាមកម្មវិធីនានា និង គ្មានបទចម្រៀងថ្មីចេញលើទីផ្សារ។
ទន្ទឹមនឹងការបាត់ខ្លួនតារាចម្រៀងសំនៀងក្រអួនធ្ងន់រូបនេះ មហាជនមួយចំនួនធំក៏បានដាក់ជាសំណួរថា តើតារាចម្រៀង ប៊ុន សក្តិ ពេលនេះកំពុងធ្វើអ្វី? និង នៅឯណាដែរ? ជាការពិតណាស់បន្ទាប់ពីរៀបការនឹងភរិយាកាលដើមខែមេសា ឆ្នាំ ២០១៦ តារាច្រៀង ប៊ុន សក្តិ បានរសាត់បាត់ឆ្ងាយបន្តិចម្តងៗពីឆាកសិល្បៈ សូម្បីតែកម្មវិធីអ្នកសិល្បៈមិត្តរួមអាជីព ក៏គេកម្រនឹងបានឃើញវត្តមានរបស់លោកចូលរួមដែរ។
តាមការឱ្យដឹង តារាចម្រៀង ប៊ុន សក្តិ ម្ចាស់បទ «ជិះក្របី» ដ៏ល្បីល្បាញនោះ កំពុងរស់នៅយ៉ាងមានសុភមង្គលជាមួយភរិយា និង ក្រុមគ្រួសារ។ នេះបើផ្អែកលើការបង្ហោះសកម្មភាពរស់នៅប្រចាំថ្ងៃជារឿយៗនាពេលកន្លងមកតាមរយៈទំព័រហ្វេសប៊ុកផ្លូវការរបស់លោក។ ទន្ទឹមនឹងនេះដែរ គេថែមទាំងបានដឹងថា ក្រោយរសាត់ឆ្ងាយពីសិល្បៈតារាចម្រៀង ប៊ុន សក្តិ ក៏មានការងារក្នុងជួរមន្រ្តីរាជការផងដែរ ដោយរូបគេគឺជាអង្គរក្សនៅបញ្ជាការដ្ឋានកងអង្គរក្ស មានឋានន្តរស័ក្ដិថ្នាក់អនុសេនីយ៍ឯក (សក្ដិ ៣)។
បើទោះជាបាត់មុខយូរពីក្នុងពិភពសិល្បៈ ប៉ុន្តែកាលពីឆ្នាំ ២០២៣ កន្លងទៅនេះ គេនៅបានឃើញតារាចម្រៀង ប៊ុន សក្ដិ ឡើងកម្មវិធីកម្សាន្តមួយរបស់ស្ថានីយទូរទស្សន៍ PNN គឺ THE WALL SONG CAMBODIA ក្នុងនាមជាតារាចម្រៀងអាថ៌កំបាំង ដោយច្រៀង feat ជាមួយ សេម ក្នុងបទ «ត្រឹមបារម្ភពីអូនក៏បងអស់ចិត្ត» ដែលការបង្ហាញខ្លួនលើនេះ បានបង្កការភ្ញាក់ផ្អើលយ៉ាងខ្លាំងដល់មហាជនអ្នកគាំទ្រ។
គួរបញ្ជាក់ដែរថា តារាចម្រៀង ប៊ុន សក្តិ ធ្លាប់ជាតារាចម្រៀងប្រុសម្នាក់ប្រចាំផលិតកម្មសាន់ដេ ដែលមានឈ្មោះបោះសំឡេងល្បីល្បាញខ្លាំងកាលពីអំឡុងឆ្នាំ ២០០០ ជាង ដោយក្នុងនោះបទចម្រៀងរបស់លោកជាច្រើនតែងបានទទួលការគាំទ្រពីមហាជន ជាពិសេសនោះគឺបទ «ជិះក្របី» ហើយបទនេះមានភាពល្បីល្បាញខ្លាំងណាស់ រហូតធ្វើឱ្យលោកក្តោបបានប្រជាប្រិយភាពកាន់តែខ្លាំងឡើងក្នុងឧស្សាហកម្មផ្នែកចម្រៀង៕
