ថ្មីៗនេះ ប្រទេសចិនកំពុងតែប្រទះបញ្ហាថ្មី ដោយមានមនុស្សវ័យចំណាស់ជាច្រើនបាននាំគ្នាចូលទៅអង្គុយជុំគ្នា នៅក្នុងហាង KFC ដោយមិនកុម្ម៉ង់អ្វីឡើយ ព្រោះតែក្តៅខ្លាំងពេក ហើយហាងមានម៉ាស៊ីនត្រជាក់ ម្យ៉ាងមិនហ៊ានបើកកង្ហារនៅផ្ទះខ្លួនឯង ព្រោះតែខ្លាចអស់ថ្លៃភ្លើងច្រើន។
តាមព័ត៌មានបានឱ្យដឹងថា មួយរយៈនេះប្រទេសចិនបានស្ថិតក្នុងរដូវក្តៅ ទើបមនុស្សវ័យចំណាស់ជាច្រើនបានដើររកកន្លែងត្រជាក់ ដោយមិនហ៊ាននៅផ្ទះឡើយ ព្រោះតែមិនចង់ចំណាយថ្លៃភ្លើងច្រើន។ ក្នុងនោះដែរ មានហាងលក់មាន់បំពង KFC មួយ នៅទីក្រុង Liaocheng ខេត្ត Shandong ភាគខាងកើតប្រទេសចិន បានកំពុងប្រទះបញ្ហានេះ គឺមនុស្សវ័យចំណាស់ជាច្រើនបានចូលទៅអង្គុយលេងក្នុងហាង អ្នកខ្លះនាំគ្នាជជែកផង លេងបៀរផង ឯអ្នកខ្លះទៀតក៏មកដេកលេង ដោយមិនបានកុម្ម៉ង់អ្វីហូបឡើយ ដែលធ្វើឱ្យប៉ះពាល់ដល់អាជីវកម្មម្ចាស់ហាងជាខ្លាំង។
យ៉ាងណាមិញ ខាងបុគ្គលិកក្នុងហាងតែងតែព្យាយាមនិយាយលួងលោមមនុស្សវ័យចំណាស់ទាំងនោះ ដើម្បីមិនឱ្យអង្គុយយូរពេក ព្រោះហាងត្រូវមានភ្ញៀវចេញចូល ហើយអ្នកខ្លះក៏ស្តាប់ តែអ្នកខ្លះទៀតមិនស្តាប់ឡើយ។ លើសពីនេះទៀត ខាងអាជ្ញាធរមិនអើពើជួយឡើយ ដោយអះអាងថាមិនមែនជារឿងខុសច្បាប់៕
ប្រភព៖ Globaltimes
