នៅព្រឹកថ្ងៃទី ២៨ ខែកក្កដា ឆ្នាំ ២០២៥ នេះ អ្នកនាំពាក្យរាជរដ្ឋាភិបាលកម្ពុជា បានបើកសន្និសីទសារព័ត៌មាន ស្ដីពីបច្ចុប្បន្នភាពនៃការឈ្លានពានរបស់កងទ័ពថៃ មកលើទឹកដីកម្ពុជា ដែលមកដល់ថ្ងៃនេះគឺឈានដល់ថ្ងៃទី ៥ ហើយ។
នៅក្នុងសន្និសីទសារព័ត៌មាន នៅថ្ងៃទី ២៨ ខែកក្កដា ឆ្នាំ ២០២៥ នេះ លោកជំទាវ ឧត្តមសេនីយ៍ឯក ម៉ាលី សុជាតា អនុរដ្ឋលេខាធិការ និង ជាអ្នកនាំពាក្យក្រសួងការពារជាតិ បានបញ្ជាក់ពីការវិវត្តន៍នៅក្នុងថ្ងៃទី ៥ នៃការឈ្លានពានភាគីថៃមកលើទឹកដីកម្ពុជា ដូចតទៅ ៖
១. ស្ថានភាពនៅសមរភូមិយោធភូមិភាគទី ៤
ភាគីថៃបានបើកការវាយប្រហារមកលើកម្ពុជា នៅថ្ងៃទី ២៨ ខែកក្កដា ឆ្នាំ ២០២៥ នេះ ដោយ ៖
– នៅវេលាម៉ោង ៣ ៖ ១០ នាទី ព្រឹករំលងអធ្រាត្រ ភាគីថៃបានបាញ់កាំភ្លើងធំចូលទីតាំងប្រាសាទតាមាន់ធំ និង តាក្របី
– នៅវេលាម៉ោង ៥ ៖ ៣០ នាទីព្រឹក កម្លាំងថ្មើរជើងបានរុលចូលប្រាសាទតាក្របី រួមជាមួយកាំភ្លើងត្បាល់ កាំភ្លើងធំគាំទ្រ
– នៅវេលាម៉ោង ៥ ៖ ៥០ នាទី កម្លាំងថ្មើរជើងដកថយទៅវិញ កាំភ្លើងធំនៅតែបាញ់ផ្លោងចូលមួយៗ នៅតំបន់តាមាន់ធំ និង តាក្របី ក្រៅពីនោះស្ថានភាពស្ងប់ស្ងាត់នៅតំបន់ផ្សេងទៀត
– នៅវេលាម៉ោង ៨ ៖ ១៥ នាទី យន្តហោះថៃបាញ់រុក្កែត F16 នៅលើតំបន់ប្រាសាទតាក្របី
-នៅវេលាម៉ោង ១០ ៖ ២៥ នាទី ភាគីថៃបានវាយថ្មើរជើងនៅថ្មដូន គាំទ្រដោយកាំភ្លើងធំ ខណៈមកទល់ម៉ោងនេះ ភាគីថៃនៅបន្តវាយលុកយ៉ាងកំរោល និង ឆេះសន្ធោសន្ធៅនៅឡើយ។
ចំពោះកម្លាំងប្រដាប់អាវុធកម្ពុជា យើងនៅតែបន្តឈរយ៉ាងរឹងមាំ តស៊ូយ៉ាងស្វិតស្វាញ ក្នុងការកាពារដែនអធិបតេយ្យ និង បូរណភាពទឹកដីរបស់ខ្លួន ដោយអង់អាចក្លាហានជាទីបំផុត។
២. ស្ថានភាពនៅសមរភូមិយោធភូមិភាគទី ៥
ចាប់ពីម៉ោង ៧ ៖ ០០ នាទីព្រឹក រហូតដល់ម៉ោង ១០ ៖ ១៣ នាទី នៅថ្ងៃនេះ
– នៅវេលាម៉ោង ៩ ៖ ៤០ នាទី មានការផ្លាស់ប្ដូរមេបញ្ជាការថៃមួយចំនួន នេះបើតាមការរាយការណ៍ពីយោធភូមិភាគទី ៥។
ក្នុងនោះ ចំពោះសភាពការនៅព្រំដែនសមុទ្រ គឺមានសភាពស្ងប់ស្ងាត់ធម្មតា មិនទាន់មានអ្វីប្រែប្រួលនៅឡើយទេ៕
