បើគិតមកដល់ពេលនេះ រយៈពេលប្រមាណជាង ២០ ឆ្នាំ មកហើយ ដែលតារាចម្រៀងសំនៀងរដឺន អ្នកនាង សូ សុភ័ក្ត្រ បានចាកចេញពីប្រទេសកម្ពុជាទៅរស់នៅឯក្រៅប្រទេសកាលពីអំឡុងឆ្នាំ ២០០២។ ក្នុងនោះដែរ បច្ចុប្បន្ន អ្នកនាង ក៏បានរៀបការសាងគ្រួសារ និង ទទួលបានចំណងដៃកូនប្រុសចំនួន ២ នាក់ហើយដែរ។
ទោះជាចាកចេញទៅរស់នៅឯសហរដ្ឋអាមេរិក អស់រយៈពេលជាច្រើនឆ្នាំហើយក្តី តែតារាចម្រៀងសំឡេងរដឺន អ្នកនាង សូ សុភ័ក្ត នៅតែបន្តអាជីពជាតារាចម្រៀងដូចដើមលើទឹកដីដុល្លារនោះដែរ។ ក្នុងនោះ មកដល់បច្ចុប្បន្ន អ្នកនាង សូ សុភ័ក្ត្រ នៅតែត្រូវបានអ្នកគាំទ្រសរសើរពីទឹកដមសំឡេងរបស់អ្នកនាង ថាមិនប្រែប្រួលទៅណាដែរ ខណៈតារាចម្រៀងស្រីរូបនេះ អាចច្រៀងបានគ្រប់ទម្រង់ មិនថាតែជាសំនៀងរដឺន ឬក៏មិនរដឺនក្តី។
ដោយឡែក ថ្មីៗនេះ អ្នកលេងបណ្តាញសង្គមហ្វេសប៊ុកមានការចាប់អារម្មណ៍នឹង អ្នកនាង សូ សុភ័ក្ត្រ នូវក្តីស្រមៃមួយរបស់អ្នកនាង ដែលមិនធ្លាប់បង្ហើបប្រាប់មហាជនកន្លងមកនោះទេ។ ក្នុងនោះ អ្នកនាង សូ សុភ័ក្ត្រ បានបង្ហោះរូប ដែលធ្វើឡើងដោយ AI ក្នុងឈុតរាត្រីសមោសរ គ្រងដោយមកុដ និង ពាក់ឈៀង Miss Florida និង អមសារមួយថា៖ «ក្ដីស្រមៃ នៅតែជាក្ដីស្រមៃ»៕
