បើគិតមកដល់ពេលនេះ រយៈពេលប្រមាណជិត ២ ឆ្នាំមកហើយ ដែលតារាចម្រៀង ស៊ូ ស៊ីរីកា បានក្លាយទៅជាតារាចម្រៀងឯករាជ្យ មិនជ្រកក្រោមផលិតកម្មណានោះឡើយ។
ក្នុងនោះដែរ ក្រោយពីផ្តាច់ខ្លួនក្លាយទៅជាតារាចម្រៀងឯករាជ្យ កញ្ញា ស៊ូ ស៊ីរីកា ក៏នៅតែបន្តផលិតចម្រៀងផ្ទាល់ខ្លួនដូចដើម ដោយមួយរយៈក្រោយនេះ ភាគច្រើនបទចម្រៀង ដែលនាងបានបញ្ចេញស្នាដៃនោះ គឺសុទ្ធសឹងតែជាបទបែបមនោសញ្ចេតនា។
ដោយឡែក អ្វីដែលកាន់តែធ្វើឱ្យអ្នកគាំទ្រចាប់អារម្មណ៍នោះ នៅថ្ងៃទី ០៣ ខែកញ្ញា ឆ្នាំ ២០២៥ នេះ កញ្ញា ស៊ូ ស៊ីរីកា បានប្រកាសដំណឹងល្អសម្រាប់អ្នកគាំទ្រ ដែលតែងទន្ទឹងរង់ចាំស្នាដៃថ្មីរបស់នាង ដោយនាងនឹងត្រៀមចេញ Mini Album ក្នុងពេលឆាប់ៗខាងមុខនេះហើយ។
តាមរយៈការឱ្យដឹងពីកញ្ញា ស៊ូ ស៊ីរីកា ប្រាប់មកកាន់ ប្រជាប្រិយ ថា Mini Album ដំបូងរបស់នាងមានឈ្មោះថា «The Silent Hill» ដែលនឹងមានចម្រៀងចំនួន ១០ បទ សុទ្ធសឹងតែជាបទចម្រៀងបែបមនោសញ្ចេតនា។ លើសពីនោះ Mini Album ក៏នឹងមានការសហការណ៍ជាមួយតារាចម្រៀងមួយចំនួនទៀតដែរ៕
