បើគិតមកដល់ពេលនេះ រយៈពេលប្រមាណជិត ១ ឆ្នាំ មកហើយ ដែលតារាចម្រៀង R&B Soul កញ្ញា Sophia Kao បានចាកចេញពីផលិតកម្មបារមី ក្លាយទៅជាតារាចម្រៀងឯករាជ្យចាប់តាំងពីថ្ងៃទី ១៥ ខែមិថុនា ឆ្នាំ ២០២៤ កន្លងមកម្ល៉េះ។
ក្នុងនោះ ក្រោយការចាកចេញពីទ្រនំចាស់ កញ្ញា Sophia Kao ក៏មិនបានចូលទៅជ្រកក្រោមទ្រនំណាដែរ ដោយនាងបានក្លាយទៅជាតារាចម្រៀងឯករាជ្យ និង បានក្តោបឱកាសក្លាយទៅជា Music Producer នៅក្នុងកម្មវិធី Rapper Fighter កាលពីពេលកន្លងមកទៀតផង។
យ៉ាងណាមិញ នៅដើមឆ្នាំ ២០២៥ នេះ កញ្ញា Sophia Kao បានបញ្ចេញចម្រៀងថ្មីជាបន្តបន្ទាប់ ជូនដល់អ្នកគាំទ្រក្រោយខកខានបញ្ចេញស្នាដៃមួយរយៈធំ។
លើសពីនោះ អ្វីដែលពិសេស បទចម្រៀងថ្មី ២ បទ ចុងក្រោយរបស់នាងបានចាប់ដៃគ្នាច្រៀងជាមួយនឹងតារាចម្រៀង និង Rapper មានប្រជាប្រិយទៀតផងរួមមានបទ «យប់នេះ» កញ្ញា Sophia Kao បានបកស្រាយជាមួយនឹងតារាចម្រៀងរ៉េប 8GK និង បទមួយទៀតមានចំណងជើងថា «Stay» បកស្រាយរួមគ្នានឹងលោក ថុល សុភិទិ៕
