អ្នកគាំទ្រវិស័យសិល្បៈ ដែលនិយមតាមដានពីរឿងរ៉ាវឯកជន និង ការងាររបស់តារាប្រុស លោក រតនៈ វិសិដ្ឋ ច្បាស់ជាបានជ្រាបហើយថា ពេលនេះ តារាប្រុសរូបសង្ហារូបនេះ បានចាកចេញពីប្រទេសកម្ពុជាទៅរស់នៅឯសហរដ្ឋអាមេរិក ប្រមាណជា ១ ឆ្នាំ មកហើយ។
ក្នុងនោះដែរ បន្ទាប់ពីទៅរស់នៅឯសហរដ្ឋអាមេរិក លោក រតនៈ វិសិដ្ឋ ក៏នៅតែបន្តអាជីពជាតារាចម្រៀងដូចដើម និង ទទួលបានប្រជាប្រិយភាពមិនចាញ់កាលរស់នៅឯប្រទេសកម្ពុជានោះឡើយ។ ជាងនេះទៅទៀត អ្វីដែលចាប់អារម្មណ៍ ទៅរស់នៅទីនោះមិនប៉ុន្មាន លោក រតនៈ វិសិដ្ឋ ក៏បានបង្ហាញមុខគូស្នេហ៍ជានារីជនជាតិវៀតណាមដ៏ស្រស់សោភាទៀតផង។
ងាកមកកាន់អាជីពសិល្បៈវិញ ដូចមហាជនបានជ្រាបហើយថា អំឡុងពេលរស់នៅឯស្រុកខ្មែរ លោក រតនៈ វិសិដ្ឋ គឺមានជំនាញផ្នែកសិល្បៈសម័យ ជាពិធីករ និង តារាសម្តែងដ៏មានទេពកោសល្យ។ យ៉ាងណាមិញ ថ្មីៗនេះ អ្វីដែលគួរឱ្យសរសើរ ដូចពាក្យចាស់លោកថា «ចូលស្ទឹងតាមបទ ចូលស្រុកតាមទេស» នោះ លោក រតនៈ វិសិដ្ឋ បានបន្ថែមជំនាញច្រៀងភ្លេងការមួយទៀត ដើម្បីបំពេញទីផ្សារសិល្បៈគ្រប់ទម្រង់នៅឯសហរដ្ឋអាមេរិក ដោយមានការជួយណែនាំពីរៀមច្បងផ្នែកសិល្បៈបុរាណនៅទីនោះផងដែរ៕
