ចប់ពិធីមង្គលការ មានអ្នកថា ណូលី និង ភរិយាមិនសមគ្នា ស្រាប់តែខាងស្រីចេញមុខការពារកិត្តិយសគ្រួសារភ្លាម

ពិតណាស់ បន្ទាប់ពីរង់ចាំពេលវេលាល្អជាច្រើនខែ កាលពីថ្ងៃទី ១៧ ខែតុលា ឆ្នាំ ២០២៥ កន្លងទៅ តារាចម្រៀង Original Song លោក ណូលី និង គូដណ្ដឹងរូបស្រស់ បានក្លាយជាគូស្វាមីភរិយាស្របតាមប្រពៃណីហើយ ដោយពួកគេបានរៀបចំពិធីមង្គលការយ៉ាងអធិកអធម មានការចូលរួមអបអរពីមិត្តទាំងក្នុង និង ក្រៅសិល្បៈជាច្រើន។

បើងាកមើលការចែករំលែកនូវ ទិដ្ឋភាពក្នុងកម្មវិធីមង្គលរបស់តារាចម្រៀងប្រុសរូបនេះវិញ ឃើញថាលោក និង ភរិយា បានរៀបចំពិធីមង្គលយ៉ាងធំដុំស្អាតប្រណីតតាមបែបប្រពៃណីខ្មែរ ជាពិសេសកូនកំលោះកូនក្រមុំ ទទួលបាននូវការសរសើរខ្លាំងក្នុងឈុតសម្លៀកបំពាក់ប្រពៃណីខ្មែរ ស្រស់ស្អាតគួរឱ្យស្រឡាញ់ស័ក្តិសមគ្នាខ្លាំង។

ដោយឡែក ក្រៅពីទទួលបានការសរសើរលើភាពស្រស់ស្អាតស័ក្តិសមរបស់គូស្វាមីភរិយាថ្មីថ្មោងអ្នកទាំងពីរ អ្វីដែលធ្វើឱ្យមហាជនចាប់អារម្មណ៍ទៀតនោះ បន្ទាប់ពីចប់ពិធីមង្គលការមួយថ្ងៃ ក៏បានឃើញហ្វេសប៊ុកភរិយារបស់លោក ណូលី គឺអ្នកនាង តាំង ម៉ីហុង បានបង្ហោះសារមួយនិយាយឆ្លើយតបទៅកាន់អ្នកលេងហ្វេសប៊ុកម្នាក់ ដែលបានប្រើពាក្យរិះគន់លើរូបសម្រស់ស្វាមីថាមិនស័ក្តិសមនឹងនាង។

ក្នុងនោះ ភរិយារបស់លោក ណូលី បានតបទៅកាន់អ្នកលេងបណ្ដាញសង្គមរូបនោះ រៀបរាប់ការពារស្វាមីយ៉ាងមានន័យ ទោះជាស្វាមីរបស់ខ្លួនមិនស្អាតសម្រាប់អ្នកណា ប៉ុន្តែស្អាតសម្រាប់នាង ដោយអ្នកនាងមិនយកសម្រស់សំខាន់ឡើយ ឱ្យតែជាបុរសដែលអាចផ្ដល់សុភមង្គលដល់នាង និង អាចយល់ទុក្ខធុរៈរបស់នាងគ្រប់សព្វ គឺគ្រប់គ្រាន់ហើយ។

សារនោះ ភរិយា ណូលី បានរៀបរាប់ថា ៖ «មុនខមមិនយកអីមកគិត? សម្ដីណាធ្វើឱ្យគេឈឺចាប់កុំយាយវាមិនល្អទេ រូបរាងពិនប្តីខ្ញុំ បើទោះមិនស្អាតសម្រាប់អ្នកណាតែស្អាតសម្រាប់ខ្ញុំ រូបរាងខាងក្រៅមិនសំខាន់ សំខាន់គេអាចធ្វើឱ្យខ្ញុំមានក្តីសុខ ឬអត់ យកប្តីមកស្អាតអាចបម្រើខ្ញុំគ្រប់សព្វអត់? ខ្ញុំរស់នៅជាមួយមនុស្សដែលអាចផ្តល់ក្តីសុខ និង បំពេញតួនាទីការងារជំនួសខ្ញុំបាន មិនមែនរស់នៅជាមនុស្សភាពស្អាតតែខាងក្រៅ ជួយអ្វីមិនបាននោះទេ យកទៅគិតម្តងទៀតមុនដើរខមមិនគេ»៕