ចំពោះបវរកញ្ញាយុវតី ជូរី ល្អហួស និង លី មួយលាង មហាជនអ្នកគាំទ្រវិស័យបវរកញ្ញាបានស្គាល់ហើយថា អ្នកទាំងពីរ សុទ្ធសឹងតែជាបវរកញ្ញាវ័យក្មេងដ៏មានឥទ្ធិពល ដែលកន្លងមកបានសាងកិត្តិយសជូនជាតិជាបន្តបន្តាប់ តាមរយៈការប្រកួតដណ្ដើមបានមកុដលើឆាកអន្តរជាតិ និង សកម្មភាពការងារនៅក្រៅប្រទេសផ្សេងៗពេញដោយកិត្តិយស។
យ៉ាងណាមិញ ដ្បិតតែមកដល់ពេលនេះ បវរកញ្ញាយុវតី ជូរី ល្អហួស និង លី មួយលាង បានបញ្ចប់តួនាទីលើឆាកអន្តជាតិក្នុងនាមជាម្ចាស់មកុដអន្តរជាតិដ៏អស្ចារ្យ ខណៈឈានដល់ពេលផ្ទេរមកុដរួចរាល់នោះ ប៉ុន្តែអ្នកទាំងពីរ ក៏បន្តឆក់បានការចាប់អារម្មណ៍ពីមហាជនអ្នកគាំទ្រកម្ពុជាលើបទពិសោធថ្មី ទាក់ទងនឹងវិស័យសម្ដែងភាពយន្តវិញម្ដង ដែលកន្លងទៅអ្នកទាំងពីរ ក្ដោបបានឱកាសថតភាពយន្តធំជាលើកដំបូង។
ពេលនេះដែរ ស្នាដៃថតភាពយន្តខ្នាតធំជាលើកដំបូងរបស់ បវរកញ្ញាយុវតីទាំងពីររូប ក៏កំពុងត្រៀមបង្ហាញជាផ្លូវការ ក្នុងសាច់រឿងខ្នាតធំដ៏ព្រឺព្រួច គឺរឿង «ម្ចាស់កញ្ចក់» ដែលកំពុងធ្វើឱ្យមហាជនអ្នកគាំទ្រលើបណ្ដាញសង្គមចាប់អារម្មណ៍ចែករំលែក និង រង់ចាំទស្សនាគាំទ្រស្នាដៃសម្ដែងកុនជាលើកដំបូងរបស់បវរកញ្ញាយុវតីដ៏មានសមត្ថភាពទាំងពីរផងដែរ៕
