បើទោះមិនបានក្លាយជាម្ចាស់មកុដ និង តំណាងកម្ពុជាទៅប្រកួតលើឆាកអន្តរជាតិក្តី តែលំដាប់រងទី ២ Miss Supranational Cambodia 2025 ហុក សារិតុលា ពិតជាទទួលបានការអបអរ និង សរសើរយ៉ាងខ្លាំង នៃការប្រឹងប្រែងនៃការប្រកួតរបស់នាង។
ជាការពិត ដូចមហាជនបានជ្រាបហើយថា មុនពេលរកឃើញម្ចាស់មកុដកាលពីរាត្រីថ្ងៃទី ០២ ខែមេសា ឆ្នាំ ២០២៥ កន្លងទៅនេះ មហាជនបានឃើញមកហើយថា កញ្ញា ហុក សារិតុលា ទទួលបានការជួយផ្តល់កម្លាំងចិត្ត ជ្រោមជ្រែង និង បង្ហាត់បង្រៀនដោយផ្ទាល់ពីរៀមច្បង ដែលជាបងស្រីជិតស្និទ្ធរបស់នាង គឺកញ្ញា ពេជ្រ វត្តីសារ៉ាវឌ្ឍី។
ក្រោយ កញ្ញា ហុក សារិតុលា បានរបូតតំណែងមកុដ Miss Supranational Cambodia 2025 ដោយបានត្រឹមលំដាប់រងទី ២ មហាជនបានឃើញបវរកញ្ញា ពេជ្រ វត្តីសារ៉ាវឌ្ឍី ក្នុងនាមជាបងស្រី មិនត្រឹមតែផ្តល់កម្លាំងចិត្តដល់ប្អូននៅលើឆាកអំឡុងពេលបំពាក់មកុដដោយផ្ទាល់ឱ្យ ហុក សារិតុលា នោះទេ តែចុះមកដល់ក្រោមឆាកហើយ កញ្ញា ពេជ្រ វត្តីសារ៉ាវឌ្ឍី បានដើរទៅក្បែរឆាកងើយមុខឱប ថើបកញ្ញា ហុក សារិតុលា ជាប្អូនស្រី ទៀតផង។
ម្យ៉ាងវិញទៀត កាលពីយប់ថ្ងៃទី ០៤ ខែមេសា ឆ្នាំ ២០២៥ កន្លងទៅ ពេជ្រ វត្តីសារ៉ាវឌ្ឍី បានបង្ហោះសារជាថ្មីម្តងទៀត ដើម្បីអបអរដល់ ហុក សារិតុលា ថា៖ «បិទវគ្គ មួយឈុតចុងក្រោយពី តីតី! សូមចូលរួមអបអរសាទរដល់ម្ចាស់ជ័យលាភី Miss & Mister Supranational Cambodia 2025 ក្នុងដំណើរដ៏មិនគួរឱ្យជឿនេះ! ខ្ញុំសូមជូនពរឱ្យអ្នកទទួលបានជោគជ័យយ៉ាងត្រចះត្រចង់ និង ចំពោះប្អូនស្រីជាទីស្រឡាញ់របស់បង ហុក សារិតុលា។ បងពិតជា មានមោទកភាពចំពោះសមិទ្ធផល ការខិតខំប្រឹងប្រែង និង ការលះបង់របស់ប្អូន។ មិនត្រឹមតែជាបទពិសោធ និង ការរំពឹងទុកប៉ុណ្ណោះទេ ប៉ុន្តែដំណើរនេះនឹងដឹកនាំប្អូនឱ្យបន្តបោះជំហានទៅមុខ និង ចែងចាំងក្នុងជំពូកបន្ទាប់។ ស្រឡាញ់អ្នក និង រួចរាល់ក្នុងការឃើញប្រទេសយើងរះត្រចង់ និង មានមោទកភាពជាថ្មី»៕
