ចង់សាកអត់? កប៉ាល់កម្សាន្តមួយ តម្រូវឱ្យភ្ញៀវពាក់ស៊ីវិល ចំណាយម្នាក់តែជាង ១ ម៉ឺនដល់ ៥ ម៉ឺនដុល្លារ បានស្រាលខ្លួន រំសាយកង្វល់ ស្រឡាញ់ខ្លួនឯងជាងមុន

នៅសល់តែមួយខែទៀតប៉ុណ្ណោះ កប៉ាល់កម្សាន្តអាក្រាតកាយនឹងចេញដំណើរជាថ្មី ខណៈបច្ចុប្បន្ន ភ្ញៀវកំពុងបុកសម្រុកគ្នាទិញសំបុត្រ។​ កប៉ាល់កម្សាន្តអាក្រាតកាយនេះ ត្រូវបានរៀបចំឡើងដោយក្រុមហ៊ុន Bare Necessities ដែលជាក្រុមហ៊ុនទេសចរណ៍ ផ្តល់បទពិសោធឱ្យភ្ញៀវបានលម្ហែលើផ្ទៃសមុទ្រ ជាមួយខ្លួនទទេ ឬ គ្មានសម្លៀកបំពាក់ ឆ្ពោះទៅកម្សាន្តកន្លែងកម្រផ្សេងៗ។

សម្រាប់ភ្ញៀវចង់លម្ហែបែបអាក្រាតកាយលើកប៉ាល់ តម្រូវឱ្យទិញសំបុត្រក្នុងតម្លៃចន្លោះពី ១៣០០០ ដុល្លារ ទៅ ៥០០០០ ដុល្លារ ក្នុងម្នាក់។ ថ្វីបើជាដំណើរកម្សាន្តបែបអាក្រាតកាយ ប៉ុន្តែនៅលើកប៉ាល់ក៏មានវិន័យតឹងរ៉ឹងមួយចំនួន សម្រាប់ឯកជនភាព និង សមរម្យផងដែរ។​

ជាក់ស្តែង ទោះគ្មានសម្លៀកបំពាក់ តែភ្ញៀវត្រូវមានអ្វីមួយបិតបាំងនៅត្រង់តំបន់សម្ងាត់ ជាពិសេស ប្រដាប់ភេទ។ មួយវិញទៀត ភ្ញៀវតម្រូវស្លៀកពាក់សមរម្យឬធម្មតា នៅពេលចូលទៅបន្ទប់ទទួលទានអាហារ ពេលចុះចតនៅកំពង់ផែ និង ពេលមានអ្នកស្រុកចូលមកសម្តែងនៅលើកប៉ាល់។ សូម្បីសម្លៀកបំពាក់បែបឈុតហែលទឹក ឬ ឈុតគេង ក៏មិនអនុញ្ញាតក្នុងឱកាសទាំងនេះផងដែរ។

តាមរយៈបទពិសោធភ្ញៀវកន្លងមក ពួកគេបាន Comment ប្រាប់ក្រុមហ៊ុនកប៉ាល់នេះនៅលើ Instagram ថា ដំណើរកម្សាន្តបែបនេះ ពិតជាអស្ចារ្យបំផុតសម្រាប់ពួកគេ ពួកគេបានស្វែងរកខ្លួនឯងមានអារម្មណ៍ធូរស្រាលជាងមុន និង ស្រលាញ់ខ្លួនឯងជាងមុន ជាមួយការលម្ហែបែបគ្មានសម្លៀកបំពាក់។ និយាយជារួម ពួកគេអាចសម្រាកជាមួយការទទួលយករាងកាយខ្លួនឯង។

ឆាប់ៗនេះ ក្រុមហ៊ុនកប៉ាល់ទេសចរណ៍អាក្រាតកាយ Bare Necessities នឹងចេញដំណើរម្តងទៀត ដែលនឹងចាប់ផ្តើមនៅថ្ងៃទី ២៦ ខែ តុលា ហើយកម្សាន្តរហូតដល់ថ្ងៃទី ៩ ខែ វិច្ឆិកា នេះ។ ដំណើរកម្សាន្តត្រូវបានឱ្យឈ្មោះថា The Scenic Eclipse II។ អ្នកចង់កក់សំបុត្រអាចនឹងខកចិត្ត ព្រោះតាមការប្រកាសរបស់ក្រុមហ៊ុន ឥលូវនេះសំបុត្រត្រូវបានលក់អស់គ្មានសល់៕

ប្រភព៖ NYP