នៅព្រឹកថ្ងៃទី ១៥ ខែតុលា ឆ្នាំ ២០២៥ នេះ តាមរយៈផេក ហុងស៊ុយ របស់លោកគ្រូចិនសែ ម៉ុង ដែលជាគ្រូហុងស៊ុយបែបវិទ្យាសាស្ត្រដ៏មានប្រជាប្រិយភាព បានចែករំលែកពីកិច្ចដាស់កើនរាសីផ្ទះ ដែលអាចធ្វើបាននៅចន្លោះម៉ោង ១៧:០០ ដល់ ១៨:៥៩ ថ្ងៃទី ១៥ ខែតុលា ឆ្នាំ ២០២៥ នេះ ខណៈទិសដែលត្រូវធ្វើ គឺទិសលិចឈាងត្បូង ហើយគ្រឿងធ្វើកិច្ចងាយៗរួមមាន អង្ករ១ចានចង្កឹះ ទៀនក្រហម១ដើម (ទំហំ១ដើម ១០០០ រៀល) រួមទាំង កាក់ចិន ឬកាក់លុយ ចំនួន ៥។
លោកគ្រូបានបញ្ជាក់ឱ្យដឹងថា ការធ្វើកិច្ចនេះនឹងជួយដល់រឿង ៣ យ៉ាងមានដូចជា ៖
១. កិត្តិយស ប្រជាប្រិយភាព លាភសំណាង
២. មុខរបររកស៊ី រុងរឿង រក្សាទ្រព្យ លាភសក្ការៈ
៣. មុខមាត់ ស្នេហា សុភមង្គល ល្បីល្បាញ ការពារជំងឺ
ចំពោះរបៀបធ្វើកិច្ចមានដូចជា ៖
១. ជូតសំអាតតំបន់ទិសខាងលិចឈាងត្បូង ឱ្យស្អាត
២. យកទៀនក្រហម ដោតចំកណ្ដាលចានអង្ករ ១ ចានចង្កឹះនោះ
៣. រួចយកកាក់ចិន ឬ កាក់លុយ ចំនួន៥នោះ រៀបលើអង្ករ ជារង្វង់ជុំវិញទៀនក្រហមនោះ
៤. ដល់ម៉ោងខាងលើ យកគ្រឿងដែលរៀបនោះ ទៅដាក់នៅជ្រុងតំបន់ទិសខាងលិចឈាងត្បូង រួចដុតទៀន
៥. ក្រោយដុតទៀន រង់ចាំ ១៨ នាទីយ៉ាងតិច ឬ អាចបន្តដុតរហូតដល់ ២២ នាទីរឹតតែល្អ ដល់ម៉ោងអាចពន្លត់បាន
៦. ក្រោយពន្លត់ អាចយកអង្ករ១ចានចង្កឹះនោះ ទុកដាំបាយហូបនៅថ្ងៃស្អែកពេលព្រឹក គឺនៅថ្ងៃទី ១៦ ខែតុលា ឆ្នាំ ២០២៥ ត្រូវដាំទាំងអស់ បើហូបមិនអស់ គឺអាចទុកហូបបន្តពេលក្រោយទៀតបាន លុះត្រាតែខូចគុណភាព ផ្អូម ចាំចោល៕
