ជារឿយៗ មិនថារវល់នឹងមុខជំនួញយ៉ាងណា អ្នកឧកញ៉ា គិត ម៉េង ដែលគេស្គាល់ជាអ្នករកស៊ីដ៏ជោគជ័យ ក្លាយជាសេដ្ឋីវាល់លាននៅកម្ពុជា រមែងឆ្លៀតពេលចែករំលែកនូវចំណេះដឹង ក៏ដូចជាបទពិសោធទៅកាន់មហាជន។ ជាក់ស្តែង ថ្មីៗនេះ អ្នកឧកញ៉ា បានចែករំលែកនូវការអនុវត្តច្បាប់ ៨០/២០ ដើម្បីឱ្យការធ្វើការងារទទួលបានលទ្ធផលបន្ថែម។
អ្នកឧកញ៉ា បានបង្ហោះនៅលើទំព័រហ្វេសប៊ុករបស់ខ្លួនយ៉ាងដូច្នេះថា៖ «អនុវត្តច្បាប់ ៨០/២០ នោះអ្នកនឹងឃើញលទ្ធផលបន្ថែមទៀតលើអ្វីដែលអ្នកកំពុងធ្វើ!
ប្រធាននាយកប្រតិបត្តិកំពូលៗជាច្រើននៅជុំវិញពិភពលោក អនុវត្តច្បាប់ ៨០/២០។ ថ្ងៃនេះ ខ្ញុំចង់ចែករំលែកនូវអ្វី ដែលខ្ញុំដឹងពីគោលការណ៍នេះ ដែលផ្តោតលើកិច្ចការសំខាន់ៗគឺ “ខំធ្វើសកម្មភាព ២០% ដើម្បីមានលទ្ធភាពទទួលបានលទ្ធផល ៨០%”។
ច្បាប់ ៨០/២០ “មិនតម្រូវឱ្យអ្នកខំធ្វើកិច្ចការគ្រប់យ៉ាង ឬចំណាយពេលវេលារបស់អ្នកធ្វើអ្វីៗឱ្យស្មើគ្នានោះទេ”។ ការខិតខំបន្តិចបន្តួចដោយភាពឆ្លាតវៃរបស់អ្នក ក៏ធ្វើឱ្យអ្នកសម្រេចបានសមិទ្ធផលច្រើនផងដែរ ហើយធ្វើឱ្យអ្នកមានអារម្មណ៍តានតឹងតិចតួចប៉ុណ្ណោះ។ សូមរស់ក្នុងជីវិតមួយកាន់តែរីករាយ និង មានន័យ តាមរយៈការផ្តោតសកម្មភាព ២០% របស់អ្នកដែលផ្តល់ផលបំផុតដល់អ្នក។
សូមពិនិត្យ និង វាយតម្លៃលើពេលវេលា ថាមពល និង ធនធានរបស់អ្នក ដែលអ្នកកំពុងប្រើ ហើយធ្វើការផ្លាស់ប្តូរ ដោយផ្តោតតែលើសកម្មភាពណា ដែលសំខាន់ៗសម្រាប់គោលដៅរបស់អ្នកបានហើយ»៕
