កុមារស្ថិតក្នុងវ័យកំពុងលូតលាស់ ពិតជាត្រូវការសារធាតុចិញ្ចឹមជាចាំបាច់ ដើម្បីបំពេញតម្រូវការនៃការអភិវឌ្ឍន៍របស់រាងកាយ។ ដូច្នេះ វាពិតជាមានសារសំខាន់ក្នុងការឱ្យកូនមានទម្លាប់ញុំាអាហារណាដែលល្អចំពោះសុខភាព។ ជាក់ស្តែង ទឹកដោះគោជាអាហារូបត្ថម្ភដ៏មានប្រយោជន៍មួយ វាសម្បូរទៅដោយកាល់ស្យូមខ្ពស់ ជួយដល់ឆ្អឹងរឹងមាំ និង លូតលាស់បានល្អ។ ដូចនេះ ដើម្បីឱ្យទឹកដោះគោក្លាយជាចំណូលចិត្តរបស់កូន និង ញុំាជាប្រចាំ អ្នកម្តាយគ្រប់រូបអាចសាកល្បងវិធីជំរុញដល់ពួកគេដូចខាងក្រោម៖
១. បង្កើតភាពទាក់ទាញ
កុមារចូលចិត្តអ្វីដែលសប្បាយៗ និង ប្លែកភ្នែកគួរឱ្យស្រលាញ់។ ដើម្បីឱ្យកូនចង់ញុំាទឹកដោះគោ អ្នកម្តាយអាចបង្កើតភាពទាក់ទាញទៅលើកែវ ដោយដាក់ទុយយោម៉ូដឃ្យូតៗ ពណ៌លេចៗ ឬ ម៉ូដមានរូបតុក្កតាដែលពួកគេចូលចិត្ត។ ចំណែកការប្រើកែវវិញ ក៏ដូចគ្នា អ្នកអាចឱ្យកូនជ្រើសរើសម៉ូដកែវណាមួយដែលពួកគេពេញចិត្ត។ កាលណាមានរបស់ទាក់ទាញទាំងនេះ វានឹងជំរុញចិត្តឱ្យកូនញុំាកាន់តែច្រើន។
២. ច្នៃទឹកដោះគោឱ្យក្លាយជាបង្អែម
អ្នកអាចច្នៃទឹកដោះគោទៅជាបង្អែមឱ្យកូនញុំា ដោយដាក់ជាមួយផ្លែឈើផ្សេងៗ ឬ លើសពីនេះអាចញុំាជាមួយអាហារក្លែមមាត់ដូចជានំប៉័ង ឬ នំពា ជាដើម។ ការញុំាបែបនេះ វាមិនត្រឹមតែធ្វើឱ្យកូនកាន់តែចូលចិត្តទឹកដោះគោប៉ុណ្ណោះទេ តែថែមទទួលបានសារធាតុចិញ្ចឹម និង វីតាមីនពីអាហារដែលបន្ថែមផងដែរ។
៣. លេងហ្គេមជាមួយកូន
សាកល្បងលេងហ្គេមបែបសប្បាយៗជាមួយកូន ដូចជាប្រណាំងគ្នាអ្នកណាចាក់ទឹកដោះគោពេញកែវមុនគេ ឬ អ្នកណាញុំាទឹកដោះគោអស់មុនគេ ឬ មួយទៀត អ្នកណាញុំាទឹកដោះគោប្រឡាក់មាត់ដូចមានពុកមាត់ធំជាងគេ ជាដើម។ ការធ្វើដូចនេះអាចបង្កើតភាពរីករាយរវាងកូន និង ម្តាយផង ហើយថែមទាំងធ្វើឱ្យកូនមានទម្លាប់ញុំាទឹកដោះគោដោយមិនដឹងខ្លួនផងដែរ។
៤. ឱ្យកូនដឹងពីប្រយោជន៍របស់ទឹកដោះគោ
កូនៗរមែងតែចាត់ទុកអ្នកម្តាយជាគំរូដ៏ល្អ រាល់ការណែនាំ និង ដំបូន្មានប្រកបដោយការលួងលោម កូនៗនឹងស្តាប់ជានិច្ច។ អ្នកអាចពន្យល់កូនឱ្យយល់ដឹងអំពីអត្ថប្រយោជន៍របស់ទឹកដោះគោ ដូចជាប្រាប់ពី លក្ខណៈពិសេស ផលល្អចំពោះសុខភាព របៀបញុំា និង ពេលវេលាញុំាត្រឹមត្រូវ ជាដើម។ លើសពីនេះ អ្នកគួរតែទម្លាប់ញុំាទឹកដោះគោនៅចំពោះមុខកូនដូចគ្នា ដើម្បីបង្កើតជាគំរូដល់ពួកគេ។
៥. ជ្រើសរើសទឹកដោះគោមានរសជាតិត្រូវចិត្តកូន
ប្រសិនបើកូនមានអារម្មណ៍មិនចូលចិត្តរសជាតិទឹកដោះគោបែបធម្មតា អ្នកអាចជ្រើសរើសទឹកដោះគោដែលមានរសជាតិឈ្ងុយឆ្ងាញ់ ព្រោះក្លិននៃរសជាតិអាចជាភាពទាក់ទាញមួយផ្នែកទៀតផងដែរ៕
ប្រភព៖ magnolia
