កាលពីថ្ងៃទី ៣ ខែឧសភា ឆ្នាំ ២០២៥ កន្លងទៅនេះ CIB ខាងប៉ូលិសស៊ើបអង្កេតកណ្តាលរបស់ថៃ បានចុះចាប់ឃ្លាំងធំៗចំនួន ៥ នៅទីក្រុងបាងកក ដែលមានថៅកែសុទ្ធតែជាជនជាតិចិន ហើយរឹបអូសបានទឹកអប់ប្រ៊េនក្លែងក្លាយចំនួន ៣ ម៉ឺនដប តម្លៃសរុបជាង ៤ លានបាត ប្រហែលជាង ១២ ម៉ឺនដុល្លារសហរដ្ឋអាមេរិក។
តាមព័ត៌មានបានឱ្យដឹងថា ដំបូងឡើយខាងប៉ូលិសចាប់បានបុរសជនជាតិថៃម្នាក់ ដែលលក់ចែកចាយគ្រឿងសម្អាង និង ទឹកអប់ខុសច្បាប់ លុះធ្វើការស៊ើបតទៀត ទើបដឹងថាបុរសរូបនេះបានទិញគ្រឿងសម្អាង និងទឹកអប់ទាំងនោះមកពីជនជាតិចិនម្នាក់ទៀត ដែលបាននាំចូលអីវ៉ាន់ទាំងអស់នោះខុសច្បាប់ ដោយលាក់ទុកនៅក្នុងឃ្លាំងជាច្រើនកន្លែងក្នុងទីក្រុងបាងកក។ ក្រោយមកខាងប៉ូលិសបានប្រមូលភស្តុតាង និង សុំដីកាចុះទៅឆែកឆេរឃ្លាំងដែលបានស្ថិតក្នុងការសង្ស័យ។
ក្នុងនោះ ប៉ូលិសបានចុះទៅឆែកឆេរឃ្លាំងចំនួន ៥ របស់ជនជាតិចិនខាងលើ ដោយរឹបអូសបានទឹកអប់ចំនួន ៣៤ ៨០៦ ដប សុទ្ធតែប្រ៊េនធំៗជាង ២០ មុខដូចជា CHANEL, DIOR, BURBERRY, JO MALONE, LOUIS VITTON ជាដើម ដែលសុទ្ធតែជារបស់ក្លែងក្លាយ ដែលបុរសនេះត្រៀមបញ្ជូនទៅលក់ចែកចាយ។ ព័ត៌មានបានឱ្យដឹងទៀតថា បុរសជនជាតិចិននេះ បានលក់ចែកចាយជាង ៣ ឆ្នាំមកហើយ ហើយចុងក្រោយក៏ត្រូវបានប៉ូលិសចោទប្រកាន់ក្រោមករណី ចែកចាយគ្រឿងសម្អាងដោយមិនបានចុះបញ្ជី និង គ្មានស្លាកសញ្ញាអក្សរថៃ និង លក់គ្រឿងសម្អាងដោយមិនមានស្លាកសញ្ញាអក្សរថៃផងដែរ៕
ប្រភព៖ MATICHON
