និយាយពីតួឯកប្រុសល្បីឈ្មោះតាំងពីជំនាន់ ២០០០ លោក យុត្ថារ៉ា ឆានី មហាជនបានជ្រាបហើយថាលោកបានឃ្លាតកាយឆ្ងាយពីវិស័យសិល្បៈជាច្រើនឆ្នាំមកហើយ ដែលគេមិនបានឃើញលោកបង្ហាញវត្តមានសម្ដែងក្នុងខ្សែភាពយន្តខ្មែរបុរាណ សម័យ និង MV បទចម្រៀងថ្មីៗដូចមុនឡើយ ដោយធ្វើឱ្យមហាជនអ្នកគាំទ្រនឹករឭកដល់កាយវិការសម្ដែងរបស់លោកមិនតិចនោះទេ។
យ៉ាងណាមិញ ស្របពេលស្ងាត់ពីវិស័យសិល្បៈនេះដែរ លោក យុត្ថារ៉ា ឆានី ត្រូវបានគេដឹងថាប៉ុន្មានឆ្នាំចុងក្រោយនេះ លោកបានប្រឡូកក្នុងវិស័យជំនួញអចលនទ្រព្យ និង បើកកសិដ្ឋានចិញ្ចឹមឃ្មុំដ៏ធំទៀតផង ហើយសំងំសាងជីវិតគ្រួសារថ្មីជាមួយភរិយាក្រោយយ៉ាងមានសុភមង្គល។
ដោយឡែក ថ្មីៗនេះ អ្វីដែលកំពុងធ្វើឱ្យមហាជនអ្នកគាំទ្ររបស់លោក យុត្ថារ៉ា ឆានី បង្ហាញការចាប់អារម្មណ៍ និង រំភើបចិត្ត បន្ទាប់ពីលេចឮដំណឹងថាលោកចង់ត្រឡប់ចូលវិស័យសិល្បៈជាថ្មី គឺចង់ត្រលប់មកសម្ដែងក្នុងភាពយន្តវិញម្ដងម្កាលទៀតផង។
នេះបើតាមរយៈការបង្ហោះលើហ្វេសប៊ុកផេករបស់លោក សាវិន ហ្វីលីព ដែលជាមិត្តជិតដិតនឹងតារាសម្ដែង យុត្ថារ៉ា ឆានី ថា បានបង្ហើបថា ៖ «យុត្ថារ៉ា ឆានី និយាយថាពេលនេះចង់ត្រលប់មកសម្ដែងភាពយន្តវិញម្ដងម្កាលដែរ»៕
