មហាជនអ្នកលេងបណ្តាញសង្គមហ្វេសប៊ុក ច្បាស់ជាបានឃើញមកហើយនូវការប្រឹងប្រែងយ៉ាងសស្រាក់សស្រាំរបស់លោក Peypey Dy ដែលបានផ្តួចផ្ដើមមូលនិធិ ដើម្បីចូលរួមជួយជាជំនួយដល់បងប្អូនកងទ័ពជួរមុខ និង គ្រួសារភៀសសឹកតាមព្រំដែន ព្រមទាំងជួយគ្រួសារវីរកងទ័ពពលីផងដែរ។ ក្នុងនោះ មូលនិធិរបស់លោក Peypey Dy ក៏មានការចូលរួមបរិច្ចាគពីសប្បុរសជនជាច្រើន ដោយមូលនិធិរបស់លោកដែលទទួលបានដល់ខ្ទង់លានដុល្លារឯណោះ។
ជាការពិត ស្របពេលទទួលបានការសរសើរ និង អរគុណនូវទឹកចិត្ត ព្រមទាំងការលះបង់ កម្លាំងកាយចិត្តរបស់លោក Peypey Dy ចំពោះការផ្តួចផ្តើមមូលនិធិខាងលើនេះ ព្រមទាំងការរៀបចំស្បៀងអាហារ ថវិកា និង យកទៅចែកជូនបងប្អូននៅតាមតំបន់ផង លោក Peypey Dy ក៏ទទួលបានមតិវែកញែកពីសំណាក់បុគ្គលមួយចំនួនតូចពាក់ព័ន្ធនឹងការចាត់ចែងថវិកាពីមូលនិធិ រហូតមានអ្នកចោទថាកិបកេងលុយជាដើម។
ក្រោយចំណាយទាំងកម្លាំងកាយ កម្លាំងចិត្ត និង ប្រាក់ផ្ទាល់ខ្លួន តែបែរជារងនូវការចោទប្រកាន់បែបនេះ លោក Peypey Dy ក៏បានបង្ហាញអារម្មណ៍ហាក់ចង់អស់ទឹកចិត្តនឹងបន្តដំណើរជួយជំនួយ ដែលលោកបានពោលថាចេញមុខរកជំនួយលើកទី ១ មិនស្មានក្លាយជាអម្រែកដ៏ធ្ងន់រហូតធ្វើឱ្យលោកចង់រាងចាល។
ក្នុងនោះ ក្រោយឃើញដូច្នោះក៏មានមហាជនអ្នកគាំទ្រជាច្រើន បានចូលមកលើកទឹកចិត្តដល់លោក Peypey Dy បន្តទៀត ក៏ព្រោះតែលោកធ្វើបានល្អហើយ កុំចាំបាច់ទៅស្តាប់ពាក្យអ្នកដទៃនិយាយ ដែលមិនបានធ្វើនោះទេ។
ជាក់ស្តែង សូម្បីតែតារាចម្រៀងរ៉េប ជី ដេវីត ក៏បានចូលមកបញ្ចេញមតិលើកទឹកចិត្ត Peypey Dy ថា៖ «បង! សុខភាពផ្លូវចិត្តជារឿងសំខាន់ បងដើរមកឆ្ងាយហើយ វែកវាជាពីរទៅ កុំឱ្យវាចូលគ្នា ព្រោះវាអាចឱ្យទ្រូងយើងតឹងដកដង្ហើមពិបាក។ ១០ នាក់ ស្អប់ ១០ លាននាក់ ស្រលាញ់ និង យល់ពីចិត្តយើង ទោះជាចុងក្រោយមានតែម្នាក់ ដែលនៅតែយល់ពីយើងច្បាស់ក៏ជាតម្លៃមហាសាលដែរ។ បងធ្វើត្រូវហើយ តែសារជាតិជាមនុស្ស និង ធម្មជាតិ គឺត្រូវតែមានពីរផ្លូវ ស្អប់ & ស្រលាញ់, រីករាយ និង ទុក្ខសោក, ទោះថ្នាំព្យាបាលជំងឺមហារីកជា ក៏គង់នឹងត្រូវប៉ះពាល់ដល់សេរីរាង្គយើងផ្សេងទៀតដែរ។ សូមថែរក្សាសុខភាព ដើរទៅមុខទៀតបង»៕
